ZPM in lawmawm tih thu sawi

ZPM Party chuan ni hnih awh Mizoram Legislative Assembly pakuana thutkhawm vawi 5-na Speaker Lalbiakzama kaihhruaina hnuaiah tluang taka neih zawh a ni chu lawmawm an tih thu thuchhuah siamin an tarlang a. “MLA te hi mipui thlantlin dan siamtu an ni a, mipuite laka an mawh-phurhna hlenchhuak turin Sawrkar fung vuantu ten an theihtawp an chhuah tih he Session-ah hian a lang. Tin, ram inrelbawlna tur dan pawimawh tak tak puluttu te, report petu te, paper pharhtu te an fakawm kan ti. Heng dan siamthat leh siam thar te hi kan ram hmasawn nan a tangkai hle dawn a; dan rorelna tundinna ram, mi dikte zalenna ram, chak taka hmasawn ram ni turin mipuiten he sawrkar hi i thlawp tlat zel ang u,” an ti bawk.