Dampa Bial by-election a MNF Candidate Dr. R. Lalthangliana

MNF President Zoramthanga chuan Dampa Bial-a Assembly by-election neih turah an Party-a Sr. Vice President nilai Dr. R. Lalthangliana chu an Party Official Candidate a nih dawn thu nimin khan a puang.

Aizawl Mizo Hnam Run-a Candidate puanna inkhawm ah hian MNF President Zoramthanga chuan Opposition nih laia by-election a din chu a hautak thu sawiin, kum hnih pawh la sawrkar lo candidate khing tura kal chu phurawm loh tak a nih bakah, MNF MLA Lalrintluanga Sailo Bial ruak-a ding tur ruat a ngai ta mai chu a lungchhiatthlak tel bawk tih a sawi a. Dampa Bial hmasawn nana Rintluanga'n hna a lo thawh mek leh hmachhawpte chhunzawm turin an Senior Vice President Dr. Thangtea hi a din a tulin an hre ta tih sawiin, “Inthlan result chhuah hma leh inthlan hma hauh pawhin Dampa Bial mipui hi an vannei hle a ni,” a ti.

MNF Sr. Vice President ni mek Dr. R. Lalthangliana hi term ruk (6) lai MLA lo ni tawhin Lunglei North Bial-ah a zâwnin Term 5 chhûng MLA a ni tawh bakah South Tuipui Bial-ah Term khat thlantlin a ni tawh a, term thum (3) Cabinet Minister ni tawhin kum 2023-a Assembly Inthlanpui neih ah khan South Tuipui Bial-ah bawk dingin hnehna a chang zo ta lo thung a ni.

Tarlan tawh thin angin Dampa bialtu MLA Lalrintluanga Sailo chu kumin July ni 21 khan a thi a, hei vang hian Dampa Bial hi Bial ruak-ah puan niin by-election neih a ngai a, hemi atan hian inbuatsaihna kalpui chhoh tan niin Election Commission of India in Dampa bial by-election neih hun tur hi a puang thuai tura rin a ni a. ZPM chuan an Candidate atan Vanlalsailova an ruat thu an lo puang tawh a ni.