Serchhip Police ten thil rutu chhui chhuak rang

Nizan hmasa (Oct. 20, 2024) zanlai pelh hnu khan Serchhip Chanmari Kawn-a Chanmari Branch YMA Information Line chu misual tu tih hriatloh ten chep chatin an ru a, he pawi khawihtute hi FIR thehluh a nih atanga reilote ah Police ten chhuichhuakin man nghal an ni.
Serchhip Chanmari Branch YMA hruaitute sawi danin nizan hmasa zanlai pelh hnu hret khan Serchhip Chanmari Kawn atanga Chanmari Vengthar lam-a YMA Information Line hi mi tu tih hriatloh ten chep chatin hrui meter 100 vel zeta thui chu an la a, nimin zing khan hei hi hriatchhuah niin he thil titu chhuichhuah an nih theih nan hian Serchhip Police Station-ah FIR thehluh zui nghal a ni a, Serchhip Police te chuan FIR thehluh a nih atanga darkar 4 vel chhungin he thil titu nia hriat Edward-a, Bazar Veng nia insawi leh Lalruatdika, Tuikhuah Veng-a khawsa mek nia insawi te chu an man nghal a, heng mite hi thubuai siam sak an ni.

Serchhip Chanmari Branch YMA te chuan Serchhip Police ten chak taka hma an lak sak leh Vantlang tana bungraw tangkai rutu nia hriat te rang taka man an ni chu an lawm hle tih an sawi bawk a ni.