Mizoram hmundangte rualin Serchhip-ah Right to Information Week, 2024 hman a ni
Serchhip DC Pisapui Hall-ah RTI Week hawnna hunah hian Addl. DC Lalrinzuala chuan Right to Information Act chu langtlang sawrkar, sawrkar tha siam nana hmanraw tangkai tak a nih thu leh a nihna tur ang taka hman thiam inzirtirna kalpui a pawimawh thu a sawi a. RTI Act hnuaia zawhna chhan hna chu ngai pawimawh tur leh, phurrit-ah ngai lo a, danin a phut ang ngei a hunbi tuk chhung ngei a chhang thin turin SPIO leh SAPIO-te chu a chah a. “Sawrkar hnathawk te hian mipuite hi hna kan thawh chhan an ni a, RTI zawhna kan dawn te tha taka kan chhan hi mipui rawng kan bawlna a ni,” tiin mipuite pawh inthlahrung lovin an dikna chanvo a ni tih hria a langtlang sawrkar, sawrkar tha kan neih theih nan RTI Act kaltlang hian an hriat duh apiang zawt thin turin a chah a ni.
Serchhip-a RTI Week 2022 hawnna hunah hian Additional SP Saidingliana Sailo chu Resource Person-ah hmangin RTI nihphung a to bul atanga sawifiahin mipui ten tangkai taka kan hman theih dan tur te, langtlang sawrkar neih theihna tura hmanraw pawimawh a nih dan te, mipui mimirin zawhna kan zawh theih dan kalphung te, SPIO leh SAPIO te mawhphurhna leh hremna dan awm thei te a sawi a. Sawrkar hnathawk, RTI zawhna dawngte chuan hunbi tiam chhunga chhanna pek ngai pawimawh turin leh a zawttute pawhin zawhna pawimawh leh awmze nei zawh nachang hriat a pawimawh thu a sawi a. RTI chungchang zirhona neih hnu hian zawhna leh chhanna hun hmangin Lalnunmawii, DIPRO chuan lawmthu sawina neiin hun a khar a ni.
Mizoram Information Commission buatsaih Right to Information Week, 2024 hi Aizawl ah chuan ATI Auditorium-ah hman a ni a, he hun hi I&PR Minister Dr. Vanlalthlana chuan hmanpuiin hriatna chu chakna a nih angin huaisen taka kan tihtur kan tih theih nan information data dik leh tha kan neih a pawimawh thu a sawi a. RTI Act chu kan ram Sawrkar inrel-bawlna tha zawk democracy tichangtlungtu nise a duh thu sawiin, sawrkar khalh ngil a, a hnathawkte fimkhur tirtu ni zel se a duhthu a sawi bawk.
He hunah hian a tum khatna atan ‘RTI Excellence Award 2024’ chu semchhuah a ni a, Mizoram Public Service Commission (MPSC) chu pakhatna niin General Administration Department (GAD) chu pahnihna leh Department of Personnel and Administrative Reforms (DP&AR) chu pathumna an ni a, Administrative Training Institute (ATI) leh Information Communication Technology (ICT) ten Consolation Prize an dawng bawk.
Mizoram Chief Information Commissioner John Neihlaia chuan, kum 2006 June ni 29 atanga kumin October ni 1 kum 18 chhungin RTI zawhna lut zawng zawng hi 35,080 a nih thu sawiin, zawhna chhanna-ah lungawi lohna avanga First Appellate, Department Appellate Authority (DAA) a zualko chu 561 chauh a nih thu leh Second Appellate Authority, Mizoram Information Commission (MIC)-a Chief Information Commissioner ho a ngaihtuah thinah 172 chauh a luh thu a tarlang bawk.
Kum 2022 July thla atangin Mobile Phone leh Computer hmanga zawh theihna RTI Online hawn thar niin, online hman atang hian zawhna a letin a lut tam zawk tih a sawi bawk a. RTI Act Rules-in a phut angin VCP leh LC Chairman te SPIO (State Public Information Officer) anga ruat vek an ni tih a sawi bawk.
Comments
Post a Comment