MNF party in Serchhip Bial-a Campaign Kickoff leh Street Campaign Thenzawl-ah an nei

MNF Party chuan Mizoram Legislative Assembly Inthlanpui neih tur atana Serchhip Bial-a Campaign Kickoff leh Street Campaign chu nimin khan Thenzawl Field Veng Kawn-ah an buatsaih a, he hunah hian Serchhip bial-a an Candidate tur J. Malsawmzuala Vanchhawng chuan Serchhip Bial mipuite tan hruaitu leh hotu ni lova an aiawh tura lo penchhuak a nih thu a sawi.

Serchhip East leh West MNF Block huaihawta Thenzawl Field Veng Kawn-a Campaign Kickoff leh Street Campaign neih ah hian Serchhip Bial-a MNF Official Candidate J. Malsawmzuala Vanchhawng chuan Serchhip Bial tana nasa taka thawk turin a inpeih tawh thu leh a phur tawh hle tih sawiin, Serchhip Bial mipui tan theihtawp chhuahin, an hmahruaia, an hnung dawltu, nawr ngai na taka nawr tlat turte in a intiam thu a sawi a. “Engtik lai pawhin in ban phakah ka awm reng anga, ka banphak ah tlanchhe lovin in tan theihpatawp ka chhuah dawn a ni,” a ti a. “Mi hausa ka ni lova, mi ropui pawh ka ni hek lo, mi naran mai ka ni a. Nangmahni ang tho, Bial chhung mi ka nih avangin in tan hruaitu leh hotu ni lovin, in aiawh tura lo penchhuak ka ni tih min hriatsak turin ka ngen che u a. Kan hma lawk inthlanpuiah pawh hian in rawngbawl hna thawh theihna remchang min siamsak a, in vote hlu tak min pe turin thinlung takin Serchhip Bial mipui ka ngen che u a ni,” a ti bawk.

MNF Candidate J. Malsawmzuala Vanchhawng chuan mipuite hnena an mamawhte tih sak tiam duah hnua bawhzui pui lo mai ni lo, ngaihthlaksak zui loh ang a ni ve dawn lo tih he hunah hian sawiin, Pathian leh mipui zara thlantlin a nih chuan Thenzawl College din chungchang pawh a rang thei ang bera zirchian leh bawhzui a tum thu a sawi a, Thenzawl thalaite chu Lothazawl-ah chirhdiak ni lo, phul chungah ngei an inkhel ngei ang tih a beisei thu leh hotute hriatpuina pawh a nei tawh tih a sawi bawk.

Nimin-a he hun hman hi MNF General Hqrs. Vice President Vanlalzawma chuan khuallian nia hmanpuiin Serchhip Bial bye-election a a ding chu a inchhir loh thu leh mipuite duhsakna a chan zawng zawngah lawmthu a sawi a. Serchhip Biala MNF Official Candidate J. Malsawmzuala Vanchhawng chu mipui duhrawn tak nia sawiin, “Inthlan kan hmachhawn mekah pawh hian MNF hi sawrkar leh ngei turin a lang riai ruai tawh a ni,” a ti. Serchhip West Block MNF President Vanlalzawna kaihhruai he hunah hian Khual zahawm nia he hun hmanpuitu Adviser to CM C. Lalramzauva leh MNF General Hqrs. a General Secretary VL. Kroshnehzova te pawhin he hunah hian thu sawiin, MNF party zawm thar mi 254 lawmluh an ni bawk.