Heroin man tam ber thleng

Excise & Narcotics Department leh 2nd Bn. Assam Rifles tangkawp chuan Zirtawpni khan Mizoram-a tum khata Heroin man hnem ber tum ni turin Heroin kg 5.114 (hawng 436) zet an man a, Excise leh Assam Rifles hian Saichal khaw bulah ruihhlo phur nia rinhlelh changin chawhnu dar 2:15-ah an rinhlelh motor pahnih chu hmuin an um zui nghal a, heng lirthei te hi an tihdin hnuah Seat cover kara thuhruk damdawi te hi an man a, a vaiin cheng vbc. 25 hu vel nia chhut a ni. Heng ruihhlo te hi Myanmar atanga lak leh Mizoram-a hralh tur nia hriat niin damdawi neitu-a puh mi pahnih Jahir Alam (23), Sepahijala District, Tripura leh Maram Miah, kum 32, West Tripura lam mi ni-a inchhal leh an lirthei te an man nghal a ni.

Hemi chungchang hi Excise & Narcotics Department chuan chhui zuiin ruihhlo tawlhna a inhnamhnawih-a puh midang panga - Lalngilneii (44) leh Zoramchuana (49), Champhai District-a Hnahlan khaw mi, tuna Chaltlang Lily Veng a khawsa mek ni-a inchhal te, Vungkhanthawma (23), Champhai Vengthar; Amir Hussain (31), Boxanagar District, Tripura leh Sukanta Karmakar (35), Jirania District, Tripura nia inchhalte chu Inrinni tlai vek khan man leh an ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man