Chhiahtlang South VC-ah VCP thlakin VC Executive Body thar siam tum mek a ni

Serchhip Town chhunga awm Chhiahtlang South Village Council-ah Executive Body thar siam tura hmalakna kalpui mek niin Serchhip DLAO hnenah hemi chungchang hi thehluh a ni tawh nia thudawn a ni.

Chhiahtlang South VC hi VC inthlan hnuhnung ber neih dawn khan Chhiahtlang VC awmsa chu pahnih-ah thenin a ding tan a, he VC-ah hian Seat 5 awmin VC inthlan hnuhnung berah khan Congress in Seat 2 an lak bakah MNF, ZPM leh Independent ten Seat khat theuh an la a, Party mal-a chak an awm loh avangin Party hrang hrangte hian VC Executive Body intawm siamin President-ah R. Lalremchhunga (MNF), Vice President-ah K. Lalbiakmawia (INC) leh Treasurer-ah C. Lalrinmawii (Ind) te an ni a. Hemi hnu hian Treasurer C. Lalrinmawii hian VC Treasurer atanga banna a thehluh avangin kumin January thla khan VC Executive Body hi siamthat niin ZPM atanga thlantlin H. Lalrawngbawla chu Treasurer-ah hian dah a ni ve leh thung a ni.

Hetianga VC an indinthar leh hnuah tunhnai khan VC Treasurer H. Lalrawngbawla hian VC Treasurer a nihna atanga banna hi thehlutin VC Executive Body thar din tur hian hmalak leh mek a ni a, thudawn danin Ningani khan Serchhip DLAO hnenah Executive Body thar siam tur te hian lehkha an thehlut a, amaherawh chu DLAO hi  awm loh lai a nih avangin karleh Thawhtanni khan hemi chungchang hi ngaihtuah a ni dawn nia thudawn  ni bawk.

Thudawn danin tuna VC Executive Body thar din tumah hian H. Lalrinawma (INC) chu President a ni anga, Vice President-ah C. Lalrinmawii (Ind) leh Treasurer-ah H. Lal-rawngbawla (ZPM) te an ni dawn a, Member -ah INC leh MNF pakhat ve ve an la awm dawn a, hetianga an indin thei a nih chuan Chhiahtlang-a VC pahnih-ah Congress in President hna an chelh ve ve dawn a ni.

Comments

Popular News (Last 30 Days)

LPG man bithliah thar