Chief Minister in hmanpui

Science Teachers' Association Mizoram (STAM) General Conference vawi 35-na chu nimin khan Aizawl-a Synod Conference Centre-ah neih a ni a, he hun hi Chief Minister Zoramthanga chuan a hmanpui a ni.

STAM General Conference-ah hian Chief Minister chuan State in zirna kawnga hma a sawn theih nan sawrkar in theihtawp a chhuah zui zel dan te, zirtirtu leh mamawh dang hrang hrangte phurhu tura hma lak zel a nih tur thute sawiin, Zirtirtute pawh theihtawp chhuah zel turin a sawm a. National Institute of Technology (NIT) a nih dan tur ang taka din a nih theih nan theihtawpa a umpui tur thu a sawi bawk.

Chief Minister chuan ram hmasawnna atana hmalakna chu ramngaw leh nungcha hum-halhna nen a inkalh ni lovin, a kalkawp theih dan zawn zel a pawimawh a tih thu a sawi a. Thil tihdan phung tha lo te, kan thil hman Environment tana tha lo (eg. plastic, etc) te pawh a thlakna tur a awm theih zel dan leh, ngaihtuahchhuah zel a tul thu a sawi a. Ram leh a chhunga chengte rualkhai leh ngelnghet taka hma kan sawn zel theihna tur chuan ngaihtuahna tidanglam a, ramchhunga awm sa leh neih sa te tangkai leh zual zawka hmang thiam turin, mahni thawhna zawn theuh a thahnemngai taka thawh a pawimawh thu a sawi bawk.

He hunah hian STAM hmalakna hrang hrangte tarlan niin heng zingah hian Mizoram Science Journal (MSJ) chhuah te, Science project siam lama naupangte inelna Childrens' Science Congress buatsaih te, Puithuna atthlak umbo tura Science thiamna hman tangkai te, Mizoram tan Central University (MZU) kan neih theih nana beih te, Aizawl khawpuia Polythene hman dan zirchian te, Pawl 10 leh Pawl 12 a Science leh Mathematics subject topper chawimawi te leh thildang te a tel a ni.