HIV/AIDS dinhmun thlirho

Nimin khan Lawngtlai-ah District AIDS Prevention and Control Committee (DAPCC) chu an Chairman leh District Bawrhsap Amol Srivastava hovin an thukhawm a, he hunah hian HIV/AIDS darh zel tur venna atana hmalakna tur kawng hrang hrang te, District dinhmun hriatchian lehzual nana endikna kalpui tam lehzual theih dan tur te, HIV hrik pai nuin a naupaia a kai chhawng tur ven nana hmalakna tur leh thil pawimawh dang te sawiho a ni. He huna tarlan a nih danin nikum April atanga kumin March thla tawp thleng khan Lawngtlai District-a General Client 2,175 endik atangin HIV hrik pai 58 hmuh niin, nu naupai 1,535 endik atangin HIV hrik pai 9 hmuh an ni bawk a. Tunhnaia Lawngtlai District-a HIV hrik pai hmuh chhuah zingah damdawi ruihtheih hmanga inchiu thin an tam ber thu tarlan a ni.