COVID-19 hri kai enkawllai mi 101 la awm mek

Nimin tlai thleng khan Mizoram-ah COVID-19 hri kai enkawllai mi 101 an la awm.

Niminpiah khan Mizoram-ah Sample 237 enfiah leh niin heng atang hian COVID-19 hri kai mi 20 hmuhchhuah an ni a, Sample enfiah atanga chhutin za zela 8.44 te chuan hri an kai a ni. Heng hri kai hmuhchhuah te hi Rapid Antigen Test hmanga Sample enfiah 231 atanga hmuh te vek an ni a, heng hri kai hmuhchhuah te hi Aizawl District-ah 9, Mamit District-ah 5, Lunglei District-ah 3 leh Kolasib, Hnahthial leh Saitual District-ah mi pakhat theuh te an ni. Niminpiah khan ZMC leh TrueNat Laboratory-ah Sample 3 ve ve enfiah awm bawkin hri kai hmuh erawh an awm lo thung.

Nimin khan Mizoram District 6 atangin COVID-19 hri kai mi 23 te chu enkawl dam an ni ve leh bawk a, heti hian nimin tlai thleng khan Mizoram-a COVID-19 hri kai hmuhchhuah tawh chu 2,28,772 niin an zinga 2,27,969 te chu enkawl dam an ni tawh a, hri kai hmuh te atanga chhutin za zela 99.65 te chu enkawl dam an ni tawh a, hri kai enkawllai mi 101 an la awm a ni.

Mizoram-a COVID-19 hri kai zingah niminpiah khan Aizawl District-a hri kai hmuhchhuah pakhat boralin Mizoram-a COVID-19 hri kai zingah mi 702 an boral ta bawk a ni.