ASF hri leng zual zelin Hri lenna hmun puan belh

Serchhip District-a Sailulak khua chu African Swine Fever (ASF) hri lenna hmunah puan a ni ve leh ta.

Sailulak khua ah hian ASF vanga Vawk thi a awm nual avangin Serchhip District-a Sr. Veterinary Officer Dr. John Lalhnuna chuan The Prevention & Control of Infectious and Contagious Disease in Animal Act 2009, Section 20 Sub-section 1 in thuneihna a pek angin June 3, 2022 atangin ASF hri lenna hmun ah a puang a, hemi hmalam hian Bawktlang khua chu hri lenna hmunah puan a lo ni tawh a ni. Heng khua atang hian Vawk lakchhuah emaw, lakluh khap tlat niin Vawk thi reng reng paih mai lovin, Chinai/Disinfectant nen thuk taka phum ngei tur a ni a, Vawk talh leh vawksa zawrh khap tlat a ni bawk.

North Vanlaiphai-a Veterinary Officer Dr. MS. Dawngliana hnen atanga thu kan dawn danin Sailulak khua ah hian ASF vanga Vawk thi 33 awm tawhin Vawk 20 suat a ni tawh bawk a, Bawktlang-ah hian Vawk thi pakhat awm belh lehin ASF vanga Vawk thi 6 awm tawhin 25 suat a ni tawh bawk a ni. Tunah hian North Vanlaiphai-ah Vawk thi 5 lai awm tawhin heng te hi an Sample enfiah tura thawn a ni tawh bawk.