Latest News

Mizoram Legislative Assembly kum 50-na pualin Special Session chu Governor hovin neih a ni

Mizoram Legislative Assembly in kum 50 a tlinna denchhenin nimin khan Mizoram Legislative Assembly 8-na Special Session neih a ni a, he hun hi Mizoram Governor Hari Babu Kambhampati chuan telpuiin Golden Jubilee hriatrengna lungphum hawngin Golden Jubilee Exhibitions a fangkual leh a. Jubilee Dar vuak a ni bawk.

Mizoram Legislative Assembly Golden Jubilee puala Special Session-ah hian Governor Hari Babu Kambhampati chuan Mizoram Legislative Assembly kum 50-na lawmna hun ropui takah a bik taka Session buatsaih ah thu a sawi thei chu vannei a in ti hle tih sawiin, MLA leh MP angin mipui rawng a lo bawl tawh thin thu leh MLA leh MP hlui a nih tawh avanga he hun hlut zia a hriatthiam thu leh mawhphurhna pawimawh tak a chang thei chu ropui a tih thu a sawi a. May 10, 1972 khan Mizoram UT sawrkar-a MLA 33 awmna Assembly thutkhawm hmasa ber chu neih a nih thu a sawi a. Hemi ni atangin hian Mizoram Legislative Assembly chuan hmalam pan zelin nasa takin hma a sawn tawh tih sawiin, “Kum 1987-a State kan nih atangin MLA 40 kan nei leh a.Tunah chuan hma kan sawn tawhin Mizoram Assembly chhunga thutkhawm neih leh an rorelna kalpui dan te pawh a felfai thin em avangin State dang te mai ni lovin Parliament tan hial pawh entawn tlaka mawi a ni,” a ti a. Kum 1986-a remna thuthlung ziah fel leh tun thlenga remna leh muanna nghet tak a awm chhunzawm ta te hi Mizoram mipuiin remna leh muanna an duh zia tarlanna tha tak a ni tih sawiin, hei vang hian kan inthlanpui neih tawh reng reng te kha a thianghlimin sawisel kai a la awm miah lo a ni, a ti bawk.

Governor chuan Mizoram hmabak a eng tih pawh sawiin, Bangladesh leh Myanmar te nen ramri kan intawm avangin Asia chhim leh Asia chhimchhak ram te leh India inkalpawhna kan ni chho mek a; KMMTTP leh Rel Kawng te a puitlin hunah phei chuan kan thawhsenloh thawhtur a awm dawn tih a sawi a. Tuna kan mamawh chu Kawlpetha hnianghnar tak siam theihna kan neih anga siam te, khualzinmite hipna tha tak tak kan neihte hmanga sum haihluh dan ngaihtuah te leh Health Sector bika tan lak zual te a ni tih a sawi bawk.

Special Session hawngtu Chief Minister leh House Leader Zoramthanga chuan India ram zalenna in kum 75-na hmel a hmuh kumah Mizoram Legislative Assembly kum 50-na tlin kan lawm thei chu a lawmawm tak zet tih sawiin, State dangte Assembly aiin la naupang zawk deuh mahse House chhunga rorelna kalpui a nih thin danah na na chuan State upa zawk te entawn a ni mek tih a sawi a. He dinhmun kan thlen theihna chhan hi Pathian kaihhruaina a vang a ni, tiin State dang ten keimahni ah remna leh muanna chungchangah zir tur an neih thu a sawi bawk.

He hunah hian Assam Legislative Assembly Speaker Biswajit Daimary chu thu sawi tura a bika sawm niin Mizoram Legislative Assembly Speaker Lalrinliana Sailo chuan Lok Sabha Speaker Om Birla-in lawmpuina thuchah a rawn thawn chu a chhiar leh a, hemi hnu hian Political Party tin aiawh thu sawi tur sawm niin MNF Party aiawhin Deputy Chief Minister Tawnluia, ZPM party aiawhin Lalduhoma, INC Party aiawhin Nihar Kanti Chakma leh BJP aiawhin Dr. BD. Chakma ten thu an sawi a, hemi hnua hian Speaker chuan tiamchin awm lovin Session chu a khar zui a ni.

Nimin-a Assembly Special Session-ah hian Speaker leh MLA hlui ve ve bakah mi pawimawh sawmbik te telin tuna Home Minister Lalchamliana, Speaker lo ni tawh nena tiamin Speaker hlui pali 4- Speaker hmasa ber Dr. H. Thansanga, Dr. Kenneth Chawngliana leh R. Romawia te chu Speaker veilam, MLA te thutna sirah thuttir an ni a. Ex-MLA te pawh Speaker veilam hung pawnah thutna siam niin Ex-MLA zingah hian State MLA Batch hmasa ber atangin K. Sangchhum leh Sapliancheuva te pawh an tel a ni.

Comments

Popular News (Last 30 Days)