Hri leng enkawllai tlem ber hun thleng leh mek

Nimin tlai dar 5:00 thleng khan Mizoram-ah COVID-19 hri kai enkawllai mi 167 awmin hei hi COVID-19 hri leng thawh hnihna hnua Mizoram-a COVID-19 hri kai enkawllai an tlem ber tum a ni.

Niminpiah khan Mizoram-ah Sample 456 enfiah leh niin heng atang hian COVID-19 hri kai mi 25 hmuhchhuah an ni a, Sample enfiah atanga chhutin za zela 5.48 te chuan hri an kai a, hri kai hmuhchhuah te hi Rapid Antigen Test hmanga Sample enfiah 441 atanga hmuh te vek niin Serchhip District-ah 8, Lunglei District-ah 6, Aizawl District-ah 5, Mamit District-ah 4 leh Khawzawl District-ah mi pakhat te an ni.

Nimin khan Mizoram-ah hri kai enkawl dam mi 34 an awm belh ve leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,27,761 niin an zinga 2,26,897 chu enkawl dam an ni tawh a, hri kai zingah za zela 99.62 chu enkawl dam ni tawhin hri kai enkawllai mi 167 an la awm a, hri kai zingah mi 697 boral tawhin tun thla chhungin hri kai boral mi pakhat a awm tawh a, May ni 2 hnuah hri kai boral an awm tawh rih lo bawk a ni.

Nimin tlai dar 5:00 thleng khan Mizoram-a District 11 zingah hri kai enkawllai awm lohna District pahnih awmin Siaha leh Lawngtlai District-ah hri kai enkawllai an awm lova, Hnahthial-ah hri kai enkawllai mi pakhat a awm bawk. Saitual District chu hri kai enkawllai tamna ber ni mekin mi 47 enkawllai an awm a, Aizawl District in dawtin mi 40 enkawllai an awm a, Serchhip District in a dawt ve leh bawk a ni.

Comments

Chhiar Hlawhte