Mizoram Lok Sabha MP kaihhruaina in Serchhip-ah DISHA thutkhawm neih a ni

Sawrkar kum kal meka Sawrkar laipui sum hmanga Serchhip District-a hmasawnna hnathawh hrang hrang dinhmun thlirin nimin khan Serchhip District Development Co-ordination & Monitoring Committee (DDCMC/DISHA) thutkhawm chu neih a ni.

Nimin-a DISHA thutkhawm hi an Chairman leh Lok Sabha MP C. Lalrosanga chuan New Delhi atangin biakhmuh theihna hmangin a kaihruai a, Serchhip-a sawrkar Department hrang hrangte chuan Serchhip DC Meeting Hall atangin District Bawrhsap Kumar Abhishek hovin an lo zawm bakah he Committee-a tel MLA te atangin Tuikum bialtu MLA Er. Lalrinawma chuan a Office atangin a lo zawm bawk a. Meeting kaihruaitu Lok Sabha MP C. Lalrosanga chuan COVID-19 hripui avangin hun engemaw chen DISHA an thutkhawm theih tawh loh thu sawiin, December, 2020-a an thutkhawm chu Serchhip District DISHA thutkhawm hnuhnung ber a ni tih a sawi a. He thutkhawm hnu lama hmalakna hrang hrangte thlirho chu he hun an hna pawimawh a nih thu tarlangin, Officer hrang hrangte inpekna leh inbuatsaihna fakin theihtawp chhuaha ram hmasawnna hna te thawk zel turin a chah bawk.

He thutkhawm ah hian Serchhip District Bawrhsap leh Member Secretary Kumar Abhishek IAS chuan DISHA Meeting hlawhtling tak a awm theih nana thawktute chungah lawmthu a sawi a. Chairman C. Lalrosanga leh Er. Lalrinawma MLA te chungah lawmthu sawiin, damlohna avanga he thutkhawm a tel theilo Co-Chairman leh Rajya Sabha MP K. Vanlalvena pawh a dam leh thuai theih nan duhsakna a hlan bawk.

Nimin-a DISHA thutkhawm ah hian Serchhip District a Central sawrkar sum hmanga hmasawnna hnathawh hrang hrangte chu a enkawltu Officer ten an tarlang a, ni za inhlawhna kalpui mekah October thla thlenga ni 71 inhlawhna pek a nih tawh thu te, a bak ni 26 pawh November leh December thlaa pek tum a nih thu te, National Rural Livelihood Missions hnuaia hmalakna te, BADP E. Lungdar Block hmalakna kal mek te, PMGSY hnuaiah District chhunga hnathawh hrang hrang te, DDUGJY, Swachh Bharat, National Health Missions, PMMVY, Sarva Shiksha hmalakna te leh hmalakna dang te tarlangin, Member ten zawh duh an neihte zawtin sawi hona an nei zui zel a ni.

Comments

Popular News (Last 30 Days)

Serchhip DCSO sawn a ni