Vaihlo hman leh TB natna chungchang zirhona nei

Nimin khan Serchhip Press Club-ah Ser-chhip District chhunga ASHA leh Health and Wellness Officer thlan bikte tan Vaihlo in taksa-a harsatna a thlen theih te leh TB natna inlaichin theih dan inzirtirna neih a ni.

 He zirhona hi Serchhip CMO, Dr. Laldawngliana Sailo chuan kai-hruaiin he huna tel te lawmna thu sawiin, hetiang inzirtirna hun chu hun pawimawh tak anih avangin uluk tak leh rilru pe lehzuala zirtirna ngaithla turin he huna tel te chu a chah a ni. He hunah hian Serchhip District TB Officer, Dr. Lalhlunpuii chuan TB natna chungchang sawifiahin, TB natna lanchhuah dan leh TB hri kai te hmuhchhuah an nih hnua enkawlna pek dan tlangpui a sawifiah a, TB natna vei te chu a thlawna enkawlna pek thin an nih thu sawiin, Chuap TB chu Vaihlo hmang nasa te tan kai a hlauhawm bik dan te pawh a sawi bawk.

Nimin-a he zirhona hunah hian Serchhip District chhunga Health and Wellness Officer mi 14 leh TB damdawi pe thin ASHA mi 15 te telin National Tobacco Control Programme-a District Consultant, K. Hmingthansangi te, National Programme for Prevention and Control of Cancer, Diabetes, Cardiovascular Diseases and Stroke (NPCDCS)-a District Coordinator, K. Zothanpuii te, ART-a Nurse, Vanlalruati leh Maria VL. Neihhlui, Counsellor NTCP te chuan thupui hrang hrang hmangin he huna kal-khawmte hi zirtirna an pe a ni.