Private Hospital leh Laboratory ten Sample Test-ah nasa taka a chhawk zangkhai theih beisei a ni

Health Minister, Dr. R. Lalthangliana chuan Private Hospital leh Private Laboratory-ah te COVID-19 Sample Test leh Rapid Antigen Test kan kalpui tan tur chuan Sample Test chungchangah nasa takin min chhawk zangkhai thei tawh dawn a ni, a ti.

SBI Foundation in Mizoram Sawrkar hnenah Ventilator 7 an hlanna puala inkhawm nimin-a a Office-a neih ah he thu hi sawiin Health Minister, Dr. R. Lalthangliana chuan tunhnaiah Sample Test tur a tam avangin Contact Tracing, Sample Collecting leh ZMC Laboratory-a Sample Test buaipuitute an hah em em tih sawiin, Sample lakkhawm sa a tam avangin duh ang leh beisei angin Sample Test hna a kal chakpui theih loh thu leh lo dawh hram hram turin VLTF/LLTF leh mipuite a ngen a. Rapid Antigen Test kit 20,000 chu nimin chhun khan Lengpui Airport-ah rawn phurh thlen a nih thu leh Directorate of Hospital & Medical Education (DHME) ami tur Rapid Antigen Test kit 9000 leh Zoram Medical College-a hman tur 1000 rawn phurh thlen a ni bawk tih sawiin, Rapid Antigen Test kit 30,000 Order fel a nih tawh thu leh karleh lamah a rawn thlen an beisei thu a sawi a. Chief Minister remruatna fel tak zarah harsatna tawk lovin kan mamawhte a hun takah kan nei zel tih pawh sawiin, GAD Aviation Wing-a Principal Consultant in an mamawhte phurhluh chungchangah hma a lak thu leh Chief Secretary-in a hun leh tha zawng zawng sengin theihtawp chhuaha hma an lakpuina zarah tha takin hma an la zel thei tih a sawi bawk.

Health Minister chuan State Bank of India inpekna ropui a tih thu pawh sawiin, COVID-19 dona kawngah pawh an thawk tha hle tih a taka hmutu a nih thu a sawi a. “Kumin June thla khan kan mamawh vanglai takin PPE quality tha tak 600 lai min lo pek tawh bakah Ventilator pawh 3 lai min lo pe tawh bawk a, Chief Minister's Relief Fund-ah cheng nuai 7 lai an hlawh an thawhkhawm atangin an hlan tawh bawk a, Zoram mipuiten in hnathawh hi kan hre reng ang,” a ti a. State Bank of India hi Zoram mipuiten COVID-19 kan dona kawngah an inhawn thu leh sawrkarin a mamawhna ah engtiklai pawhin tha tak leh rang takin an lo chhawn nghal vat zel a ni tih sawiin, State Bank of India, Mizoram bakah Headquarters lama an hotute chungah thinlung taka lawmthu a sawi thu a sawi bawk.

State Bank of India-in Mizoram sawr-kar hnena Ventilator 7 an hlan te hi Agva Health Care siam, Agva Ventilator (AV-AD-COVID) a ni a, Ventilator pakhat hi Rs. 1,48,550/- man niin, GST nen a vaiin Rs. 11,64,632/- man a ni a. Heng Ventilator te hi SBI Aizawl Region-a Regional Manager, LP. Lalchangkima chuan Minister hnenah hian a hlan a ni.

SBI Regional Manager chuan Ventilator-te hi SBI Corporate Social Responsibility (CSR) kaltlang a pek a nih loh thu sawiin, SBI malsawmna dang, SBI Foundation kaltlanga pek a nih thu a sawi a. Ventilator-te chu Mizo-ram sawrkarin a remchan dan ang anga an hman turin an hlan tih a sawi a, a tul a nih chuan khawl bun thlengin puih an inhuam thu a sawi bawk. Hei bakah hian SBI hnathawkten an ni hnih hlawh chu a tul anga hri leng dona a hman turin PM CARES Fund-ah an chhunglut tawh tih a sawi bawk.