Cancer vangin KL. Liana boral

Mizoram-a eiruk dona kawnga mi hriat hlawh leh sawrkar hnathawk zinga eiru lo nia hriat, KL. Liana chu nimin tlai dar 3:00 khan Cancer vangin a boral a, Vawiin-ah vuiliam a ni ang.

Kum 67-a upa KL. Liana hian kum 2000 khan Non-Hodgkin’s Lymphoma (NHL) Cancer a nei tih hmuhchhuah a ni a, hun rei tak chu Cancer hian a tibuai lutuk lo a, hna pawh a thawk zui reng a ni. Kum 2019 kumtìr lam atangin harsatna a nei tan a, June 2, 2019-ah Ebenezer Hospital-ah dahluh niin, chumi hnua an endiknaah a Thlîng (bone marrow)-ah Cancer Cell hmuh a ni a. November 2019 atangin Mizoram State Cancer Institute, Zemabawk-ah Radiotherapy lâktír a ni a, dam-dawi In leh In lamah te enkawl zui a nih hnuah nimin tlai khan a boral zui ta a ni.

KL. Liana hi July 11, 1983-ah Mizo-ram Judicial Service (MJS)-ah a tling a, hna hrang hrang a thawh hnuah  December 31, 2019-ah pension-in a chhuak a, thuziak mi niin dan lam kaih-hnawih thu chi hrang hrang a ziak thin a ni. KL. Liana hian J. Vanlalruati chu nupui-ah neiin fa mipa 3 leh hmeichhia pakhat a nei a ni.