Chakma a pawnga pui-a dodal chi nilo tih sawi

Chief Minister,, Lal Thanhawla chuan Chakma-te chu India khua leh tui dik tak a nih avangin a pawnga puia dodal ngawt chi an ni lo niin a sawi.

Nimin a Aizawl Congress Bhavan-a inkhawmah Chief Minister chuan he thu hi sawiin, Chakma chungchang chu Politics-a intlansiakna atan hman chi a ni lo tih a sawi a, Politics a nih avangin engkim tih a thiang vek kher lova, pawl anga hmalak a nih reng rengin ringtu tih a tan a mawi em tih ngaihtuah tel a \ul tih a sawi. Chief Minister chuan, Arunachal Pradesh-a Chakma awmte chu Sorkar laipuiin a thuneihna hmanga a barh luih a nih thu leh tunhnaia Supreme Court-in India khua leh tuia pawm tura a tihna Arunachal Pradesh mipuiin an dodal chu an tih tur dik tak a nih thu a sawi a. Mizoram bikah chuan Chakma-te chu dan ang taka khua leh tui nihna nei an nih avangin an nihna pawm thiam mai a \ul tih sawiin, heti chunga dodal an nih chuan chi leh chi inthliarna rawngkai a nih theih dawn avangin fimkhur thiam a ngai tih a sawi.

Chief Minister chuan Chakma-te chu India khua leh tui a nih avangin an sahimna ngaihtuahtu chu dan hnuaia Sorkar mawhphurhna a ni a, anmahni \an vang ni lovin dan leh thupek kenkawh chu Sorkar mawhphurhna a nih avangin venghimna hna thawh kawngah Sorkar-in a tih tur a ti dawn tih a sawi a. A \ul a nih chuan silai hmehpuah pawh a ngai dawn a, hemi kawngah hian a \ul anga hmala turin dan leh thupek kengkawhtute pawh a tih dan tur hrilh an ni tawh niin a sawi.

Chief Minister, Lal Thanhawla chuan, Chakma-te chu nekchep an tum a nih chuan tharum ni lovin, zirna lam leh sumdawnna lama \anlak chu tih dan tur dik nia zawk a ngaih thu leh haw haw-a nawr an nih chuan tun aia dinhmun \ha zawk nawr chhuah sak palh hlauhawm a tih thu a sawi a, pawi an lo khawih a nih pawhin a chinfel dan zawnga sawipuitu nih thiam zawk ngai a tih thu a sawi.

Chief Minister chuan, CBI kolut tura ngentute hian CBI chu duh hun huna kohluh theih a ni lo tih an hrechiang hle niin a sawi a. CBI koluh chungchang hi kum 10 chhung Sorkar an kaihhruai lai khan an hriatchian hman avangin an hlau lo nia a ngaih thu leh amah chu tan tir an duh tak tak a nih chuan Court-ah Criminal Case thehluh mai se \haa a hriatpui zawk thu a sawi bawk.

Chakma District Council pek chungchang sawiin Lal Thanhawla chuan, Pu Chawngkunga Deputy Speaker a nih laiin, Political Party hrang hrang hruaitute koh an nih \umin Chakma chungchanga tute mah political party te inpuhmawh tawh lo tura rel a ni a ti a, tuna District Council an rawn neih ve ah hian tu Party mahin mawh an phur lova, North Eastern Area Re-organisation act in a rawn hrin zawk a ni tih a sawi bawk.