Aizawl Civil Hospital-ah damdawi man tlawmna hawn tum.

Mipui nawlpui leh miharsa zawk ten man tlawm zawka damdawi an lei theihna tur 'Generic Drugs Store' chu kumin chhung hian Aizawl Civil Hospital compound chhungah hawn hman tum a ni.

He dawr hi Aizawl Civil Hospital Main building bula mitthi dahna In ah bul\an phawt tum niin Cabin bula building sak zawh anih hunah sawn tum a ni a, tunah hian license buaipui mek a ni. ACH Hospital-a Medical Superintendent Dr. Rosangluaia chuan Generic Drugs Store a zawrh turin sorkar laipui chuan item (damdawi) 361 a thlanchhuah/phal a nei tih a sawi a, mahse damdawi zawng zawng an mamawh vek dawn loh avangin mamawh zualpui chauh an zuar rih dawn tih a sawi a. An damdawi zawrh chu Doctor te chawh turin an tilui dawn lo tih sawiin, "Doctor te chuan an duh leh \haa an hriat apiang an chawh thei dawn a, hmanglui turin kan ti dawn lo a ni," a ti.
    Damdawi hi Company ten an siam zawhah packing titu (Company dang) ten la in an hnen a\ang hian stockist/wholesale ten an la chhawng a, chumi hnuah damdawi zuartu ten an la chhawng ve leh a. Heng te hian hlep neia thil an tih vek avangin damdawi man a to phah \hin a. Generic Drugs Store neih turah hi chuan damdawi siamtu Company te kha direct in dawr an ni ang a, tuammawi leh pawlhdal awm lovin a nihna ang angin zawrh a ni dawn a, damdawi pawhin hna a thawk chak zawk dawn a ni. Dawr hi peih anih hunah chuan tuna damdawi Rs. 100 man vela mipui ten an lei \hin hi Rs.20 vela lei theih beisei a ni. Generic Drugs Store hi Ministry of Chemical & Fertilizers hnuaia Department of Pharmaceutical hmalakna a din tur niin Rajasthan leh Gujarat-ah te hlawhtling taka kalpui a ni tawh a, tunah hian Maharastra state ah bul\an leh mek a ni a. Damdawi te hi sorkar laipui in a man a bithliah zat ang chiaha hlep awm lova hralh tur niin, an hralhna a\anga 15% chu a zuartu ten an hlawh ang. He Dawr-a damdawi te chu tuna damdawi dawr ami aiin 70% vela tlawm zawk tura beisei niin dawr hi sq.ft.120 aia te a ni tur a ni lo a, thawktu 3 tal a awm a ngai a, nikhatah darkar 12 chhung tal hawn tur a ni bawk a ni.