Parliament inthlanpui neih hun tur puan a ni. Mizoram-ah April 9, 2014-ah vote thlak tur a ni.

Kumin June ni 1-ah Lok Sabha term dinglai a tawp dawn avangin Lok Sabha inthlanpui vawi 16-na chu thla thar April ni 7 a\ang khian neih a ni dawn a, May 16, 2014-ah vote tla te chhiar a ni ang.

Lok Sabha 16-na dinna tura inthlanpui neih tur chungchang hi Chief Election Commissioner, CEC, VS. Sampath chuan nimin khan New Delhi-ah thuthar thehdarhtute hmaah a sawi a, he inthlanpui hi thawh 9-a neih tura ruahman niin inthlan thawhkhatna, April ni 7, 2014-a neih turah Assam leh Tripura-ah vote thlak a ni anga, a thawh hnihna ah Arunachal Pradesh, Manipur, Meghalaya, Mizoram leh Nagaland-ah te April 9, 2014-ah vote thlak leh a ni bawk ang. Inthlanpui thawh 3-na April ni 10-ah State 14-a bial 92-ah inthlanna neih tur niin a thawh li-na atan April ni 12-ah State pathuma bial 5-ah neih leh tur a ni a. Inthlanpui thawh 6-na chu April ni 24-ah State 12-a bial 117-ah, a thawh 7-na chu April ni 30-ah State 9-a bial 89-ah, a thawh 8-na chu May 7, 2014-ah State 7-a bial 64-ah leh inthlan thawh hnuhnung ber tur atan May 12-ah State 3-a bial 41-ah neih leh a ni anga, heng te hi Chhattishgarh, Uttar Pradesh leh West Bengal State te an ni a. Inthlan neih tur hriattirna chhuah hmasa ber tur chu March 14, 2014 khian tihchhuah a ni ang.
    Lok Sabha inthlanpui hi tluang taka neih a nih chuan May 16, 2014-ah vote tla te hi rampumah a ruala chhiar tura ruahman a ni a, tuna Lok Sabha dinglai term hi June 1, 2014 khian a tawp dawn avangin May 31, 2014 khian House thar chu peihfel hman a ngai dawn a ni. Tun \uma Lok Sabha inthlanpui neih turah hian ramchhungah vote nei thei mi vbc. 81.4 chuang an awm dawn a, inthlanpui neih hnuhnung ber ai khan mi vbc. 10 velin vote nei hi an pung a. State tinah kumin January thla khan Roll Revision neih a ni a, Final Electoral Roll pawh tarchhuah tawh niin Electoral roll a hming chuang leh harsatna nei te tan Election Commission of India chuan ruahmanna hran a siam a, 9th March 2014 hian ramchhunga state tinah Booth Level Officer ten Electoral Roll a hming chuang lote hming an ziaklut dawn a ni. Kumin Lok Sabha inthlan ah hian Electronic Voting Machine (EVM) hman tur a ni a, Supreme Court hriattirna angin None of the Above "NOTA" pawh options zingah telh a ni anga, Photo Voters Slip pawh hman a ni ang. Chief Election Commissioner VS Sampath chuan Mizoram leh Nagaland State Assembly inthlana hman chhin ang VVPAT chu tunah hian a siamtu company te hnenah 20,0000 an order thu a sawi a, hei hi a \angkai thei ang bera hman tum a ni, a ti bawk.