MNF President in an chak loh a pawm tih a sawi

MNF President Pu Zoramthanga chuan, MLA Gen. Election 2013 result-a MDA-in hnehna a chang lo chu Pathian remruata a ngaih thu a sawi a, “Kan chak loh hi kan pawm a, Mizo Nationalism erawh hneh a la ni lo hi kan lawm a ni,” a ti.

He thu hi nimina an party Office-a inkhawm neih ah a sawi a, Pu Zoramthanga chuan MNF MLA thlan thar te chu Pathian in a pek te an nih thu sawiin, “Pathian hnen ah keimahni mamawh tawk ni lovin, kan mamawh a tih tawk Vote leh MLA min pe turin kan dil a. Kan mamawh a tih tawk min pe a, Pathian hnenah lawmthu ka sawi,” a ti a. Vote petu Mizo mipuite hnenah lawmthu sawiin, a tling leh tling ta lote hnena vote petu Zoram mipui hnenah thinlung takin lawmthu a sawi a, inthlannaa sorkar hnathawk leh a buai-puitu zawng zawng, venhimna lama thawktute, kohhran leh NGO, MPF te hnenah pawh lawmthu a sawi tih a sawi a, anmahni chu sorkar siam turin an inpeih viau in hre mah se chung lamin an inpeih hun a enlo tih a sawi bawk.