Serchhip-ah Draft Mizoram State School Drug Policy 2026 chungchang sawihona neih a ni
He sawihona Serchhip DC Meeting Hall-a neih ah hian Bawrhsap, Paul L. Khuma chuan ruihhlo chungchang inzirtirna chu chhungkua atanga bul tan a pawimawh thu sawiin, nu leh pa te tan pawh Awareness neih a pawimawh thu a sawi a; School Performance Review & Monitoring neih that te, Awareness atan Comprehensive Study Material/Syllabus mumal tak neih te, Drug kaihhnawih Committee hrang hrang NMBA, NCORD leh a dangte nena inzawmna mumal tak neih te leh zirlaite ngei inhman theihna tur Anti-Drug Committee/Club dinte chu Policy-a telh makmawh nia a hriat thu a sawi a ni.
He sawihona hunah hian Serchhip SDEO Melody L. Betlu chuan ‘Draft Mizoram State School Drug Policy 2026’ hi sawizauin he Policy hi zirlaite ruihhlo hmansualna laka venna tura buatsaih a nih thu te, zirna In-a ruihhlo hmansual inzirtirna nasa zawka kalpui te, rilru hrisel leh nun dan dik zirtir leh kawng hrang hranga zirlaite thuamchakna tur atan te he Draft Policy hi duan a nih thu a sawi a, Line Department hrang hrangte nena thawhhona tha lehzual siam dan turte pawh he policy-ah hian telh a ni.
He Policy sawizauna hunah hian Draft Policy hi chik taka en ho niin siam that ngai leh belh ngai nia hriatte sawiho a ni a, State Level Committee-in a ngaihtuah that leh turin rawtna engemaw zat siam a ni a. Naupangte Awareness Campaign leh Counselling neihpui turin Dedicated Trained/Professional Counselor ngei awm thei se tihte sawilan niin, thawktu indaih lohna a awm a nih pawhin Cluster Approach tala kalpui theih ni se tihte chu rawtna langsar zingah a tel a. District Level Consultative Committee-in rawtna a siamte hi State Level-ah ennawn leh tur niin he Draft Policy hi approved a nih chuan School anga India rama ruihhlo dona policy hmasa ber a nih tur thu he thutkhawm ah hian tarlan a ni bawk.
He policy tum ber chu vaihlo, zu leh ruihhlo dangte tih tlem leh ven a ni a. Hremna lam aiin zirtirna, puihna leh siamthat (rehabilitation) lam a ngai pawimawh zawk a. Ruihhlo bawih-a tangte chu endawng an nih loh nan leh theihna an neih anga sikul danga tha taka an luh chhunzawm leh theih nan ruahmanna a siam a ni. Zirlaite nunphung tha zawkah chherchhuak turin 'Life Skills' leh rualpawlna (interactive learning) hmanga zirtirna pek te, ruihhlo lam an hnaih dawn tih hriat lawk leh an zirlai a tlakhniam theihna laka ven (early intervention) te leh an harsatnate hriatpui tura screening leh counseling neih chu he dan duan mekah hian ngaih pawimawh a. School tinah Anti-Drug Committee din tura ruahman a ni a, he Committee hi thla thum danah vawi khat tal thukhawm tura tih a ni bawk.