Lawngtlai District-a ERO pakhat zurui-a puhin koh kir a ni

Lawngtlai District Addl. DC, Electoral Registration Officer (ERO) ni bawk chu Electoral Roll Special Intensive Revision (SIR) buaipui lai a Zu rui a puh a nih avangin kohkir a ni.

He ERO hi Borapansury Polling Station-a Claims & Objections chungchang buaipui a nih laiin Zu a rui ni a puh a ni a, hei hian Central YMA hruaitute beng pawh thlengin Chief Electoral Officer (CEO) hnenah thlen a ni tawh a. Election Commission of India (ECI) pawh hriattir a ni tawh nia thudawn a ni a. ECI hian a tul angin thutlukna a siam thuai dawn ni a hriat a ni. Lawngtlai Bawrhsap leh District Election Officer (DEO), Donny Lalruatsanga chuan he inpuhna avang hian ERO hi Lawngtlai-a a koh tawh bakah Borapansury leh he ERO hova SIR kalpui tawhna khaw danga Claims & Objections Hearing lo kalpui tawh zawng zawng pawh a bul atanga tan tha leh vek turin thupek a siam tawh bawk.

Borapansury-a BLO leh Political Party aiawh BLA bakah Chakma pawl hrang hrangte chuan zu ruih vanga a hna thawk tha thei lo anga ERO puhna hi thu dik lo niin thuchhuah siamin an tarlang thung a, ERO hi a ruih vang ni lovin a hrisel that loh avanga hna thawk tha thei lo niin an sawi a ni.

Hetihlai hian Lunglei District-a Tlabung khaw bula Lamthai Polling Station-a Electoral Photo Identity Card (EPIC) lem hmanga Electoral Roll a inthun tum te chu Tlabung YMA hruaitu te’n man chhuakin Police-ah FIR an thehlut a, an EPIC lem siamtu hi Aizawl ami ni a hriat a ni a, chhui zui mek niin EPIC lem siam nan hian mi pakhat ah Rs. 6000 zel a lak thu EPIC siamtirtute hian an sawi a Birth Certificate lem pawh engemawzat a lo siam tawh niin an sawi.