Food Testing Laboratory din chungchang sawipui

Health Minister Lalrinpuii chuan nimin khan Food Safety and Standards Authority of India (FSSAI) Chief Executive Officer, Rajit Punhani IAS kawmin Mizoram in Food Testing Laboratory changtlung zawk a mamawh dan a sawipui.

New Delhi-a cham mek Health Minister Lalrinpuii hian nimin khan New Delhi-a FDA Building-ah Food Safety and Standards Authority of India (FSSAI) Chief Executive Officer Rajit Punhani hi kawmin Mizoram chu a mi cheng zat za zela chhutin India ram pumah Cancer tamna ber State a nih mek thu sawiin, ram changkang zawkte anga kan ei leh in tur - thlai leh thei hrang hrangah mihring tana tha lo Chemical residue a awm leh awm loh uluk taka enfiah reng kan mamawh thu a sawi a. Ei tur siam license pek theihna tur tawk vel Laboratory mai ni lo, mipuiten an ei leh in tur zawng zawng, siam sa leh siam loh te thlenga a him tawk leh tawk loh an hriat theihna tura Surveillance tha leh chumi Support tur Laboratory tha kan mamawh thu FSSAI CEO hi a hrilh a ni.

FSSAI Chief Executive Officer, Rajit Punhani chuan Health Minister hi tha taka lo dawngsawngin, Food Safety chungchang pawimawhzia hriaa Minister ngeiin Mizoram mamawh a thlen chu lawmthu a lo sawi a. Laboratory tha zawk neih theihna tura proposal leh tul dangte ngaihtuah tur Technical Team a rang lama Mizoram-a tirh a tum thu a lo hrilh nghal bawk a. FSSAI lamin building sakna an tum theih loh avangin Sawrkarin Laboratory building tur erawh chu an ruahman a ngaih tur thu CEO chuan Health Minister hi a hrilh a. Ruahmanna awmsa te pawh a hmunah rawn enchian tir nghal a tum thu sawiin, a rang thei ang bera hmalak nghal an tum thu a lo hrilh a ni.