Assembly thutkhawm tan a ni
Thutkhawm tan rualin kumin July ni 3 zana boral Education Minister hlui F. Malsawma sun hun hman niin House Leader Lalduhoma leh Leader of Opposition, Lalchhandama Ralte bakah MNF Legislature Party aiawhin Dr. R. Lalthangliana; INC Legislature Party aiawhin C. Ngunlianchhunga; ZPM Legislature Party aiawhin Dr. Vanlalthlana; BJP Legislature Party aiawhin Dr. K. Beichhua leh PWD Minister, Vanlalhlana ten F. Malsawma uina thu an sawi a ni.
Sunna hun hman zawh hian zawhna leh chhanna hman zui niin East Tuipui bialtu MLA, Ramthanmawia'n Electric Smart Meter chungchanga Calling Attention a nei a. Aizawl West-I Bialtu MLA, TBC. Lalvenchhunga'n ‘State Institute of Hotel Management Building sak zawh tawh, hun rei tak chhung function lova awm hi, tualchhung miten tangkai zawka kan chhawr theihna turin chak taka hmalak ni se. A tul a nih chuan outsource turin emaw, GAD hnuaia 'The Mizoram Government Land Pooling and Management Scheme' anga a tul anga hman tangkai turin chak taka bawhzui ni rawh se,’ tih Motion a putluh chu sawiho a nih hnuah lungrual taka pawm a ni a. Sawrkar lehkha pawimawhte House-a pharh a nih bakah Home Minister, K. Sapdanga'n 'The Mizoram Regulation of Fireworks Bill, 2026' leh Irrigation & Water Resources Minister, PC Vanlalruata'n 'The Mizoram Water Information & Governance Bill, 2026 an put luhte chu sawiho a pawm a ni a. Industries Minister, F. Rodingliana'n 'The Mizoram Industrial Area (Management, Regulation & Control) (Amendment) Bill, 2026' a put luh chu Minister a awm loh avangin Ningani-a sawiho tura dah a ni.