Taxation Department Chhiah hmuh a punlaiin GST atanga hmuh erawh a tlem thung

Mizoram sawrkar Commissioner of State Tax hnuaiah GST-a inziaklut sumdawng mi 9443 an awm mek a. Nikum chhung khan kum hmasa aiin sawrkar in GST atanga sum a hmuh chu a tlem zawk a, Chhiah chi hrang hrang hmuh erawh kum hmasa lam aiin a tam zawk thung.

Goods and Services Tax (GST) atang hian kum 2024-2025 chhung khan Mizoram sawrkar chuan Rs. 937,76,93,760/- a hmu a, kum kalta 2025-2026 khan Rs. 931,62,76,931/- hmu lehin kum hmasa aia nikuma sum hmuh tlemna zat hi Rs. 6,14,16,829/- a tling a. Zalen-in RTI hmanga a zawhna chhangin Commissioner of State Tax SPIO chuan Mizoram-a GST pe tam zual sumdawng pathum te chu Dhariwal Buildtech Limited, Brn Infrastructures Private Limited leh Pawan Hans Limited te an ni tih a tarlang a ni. Mizoram-a sumdawng ten GST an pek that leh that loh zawhna chhangin SPIO chuan Mizoram chhunga sumdawngte hian tlangpui thuin GST an pe tha thawkhat hle a. Department data thar ber (April 2026 Return Filing) atanga chhutin, Mizoram-ah hian sumdawng inziaklut (Total Taxpayers) 9,443 an awm mek a. Heng zinga mi 6,741 te hian GSTR-3B Return an file a ni. Heti hian sumdawng inziaklut zawng zawng atanga chhutin 71.38% velin GST hi an pe (return an file) tih a sawi bawk.

GST pe tha lo emaw pe duh lo emaw hrem an awm leh awm loh zawhna chhangin hrem an la awm lo a. Amaherawh chu Taxpayer (sumdawng/contractor/ supplier etc) zingah Tax an pek tur zat pe lo emaw, pe dik lo emaw an awm em tih hi engtik lai pawha vil reng a ni a, a theih ang ang zawnchhuah an niin chung te chu dik taka pek dan tur kawhhmuh thin an ni tih a sawi bawk.

Hetihlai hian Taxation Department hian GST bikah hian kum hmasa phak lo mahse Chhiah chi hrang hrang an khawnah erawh nikum aiin an hmu tam zawk a. Commissioner of State Tax HK. Lalhawngliana chuan website lama an tarlan aiin nikum-a an sum hmuh chu a tam zawk tih a sawi a. Commissioner of State Tax HK Lalhawngliana chuan, “Kan Department in sawrkar kum tawp (March 2026) a kan sum khawn/hmuh kan chhut chu Rs. 12,78,55,13,765 niin kan ngai a. Mahse AG lam te nen reconciliation kan tih hnuah hei aia tam Rs. 12,81,22,96,600 a lo ni zawk a, Department website a tarlan aia nikum kan sum hmuh tam zawkna hi Rs. 2,67,82,835 a ni,” a ti.

Commissioner of State Tax chuan hmathar an lak hnuah an sum khawn chhuah pawh a pung tih sawiin, “Sawrkar min phalsak angin Department Structuring kan ti a. Aizawl Zone li (4) awm thin kha Zone hnih, North Zone leh South Zone-ah siam a ni a, hei bakah Policy & Law, Intelligence, Audit, Recovery leh Enforcement Wing te siam tharin theihtawpin hna kan thawk a. Hei vang hian kan sum khawn chhuah pawh a pun phah a ni,” a ti bawk.