Minister-in Kolkata MUHCS Empanelled Hospital a tlawh

Health Minister Lalrinpuii chuan Inrinni khan Kolkata-a Mizo damlo refer tamna MUHCS Empanelled Hospital, Natralaya RN Tagore Hospital leh Manipal Hospital, EM by-pass Road ami te chu a tlawh.

Health Minister hian RN Tagore Hospital chu tlawhin he damdawi In hi Lung lam leh Kal thlakna lama experiance nei tha tak an ni a, Civil Hospital, Aizawl-a Kidney Transplant kalpuina tura puitu Hospital an ni a. Tunah hian Civil Hospital Doctor leh Staff ten training thawh khatna an zo tawh a, training thawhhnihna neih leh tum mek a ni. Health Minister chuan damlo refer te lo enkawl mai bakah Tagore Hospital leh Mizoram damdawi In te chuan Mizoram Sawrkar damdawi In tihchangtlunna tura hmachhawp hrang hrangah thawhhona tam zawk neih a duh thu a sawi a, damdawi In-a awm mek Mizo damlo te pawh harsatna an neih leh neih loh zawtin a kan nghal bawk a ni. Hei bakah damlo boral palh an awm a, Death Certificate pekchhuah muang deuh hlek thin pawh a rang thei anga pechhuak turin Tagore Hospital hotute chu a ngen nghal a ni.

Hemi hnu hian Manipal Hospital tlawhin he Hospital hi Cancer lamah Super Speciality Hospital niin, khawl thar tha ber ber te nena thuam an nih avangin Cancer enkawlna kawngah chuan an rintlak thu an lo hrilh a. ICU leh Radiation Wing te a tlawh nghal bakah damlo inenkawl mekte pawh kan nghalin, harsatna an neih leh neih loh te a zawt nghal bawk. Manipal Hospital hotute pawhin an Hospital hrang hranga damlo an enkawl dan te, Super Speciality Branch hrang hrang an neihte an lo hrilhfiah a, damlote chu theihtawp chhuaha an lo enkawl thin thu sawiin, theihtawp chhuah chhun-zawm zel an tum thu an sawi bawk. Health Minister chuan Mizoram chhunga Nursing College hrang hranga Campus Recruitment neihpui atan a sawm nghal a, Anni pawhin Manipal Hospital hrang hranga thawk turin Mizo Nurse tam zawk thawktu atana mamawh thu an lo sawi bawk a ni.