District Sustainable Development Index report-ah Mizoram District te hmahruaitu an nih thu sawi

Chief Minister Lalduhoma chuan Hmarchhak Bial District Sustainable Development Index report-ah Mizoram District zawng zawngte chu hmahruaitu (front runner) an ni mek vek tih a sawi.

Nimin khan New Delhi-a Rashtrapati Bhavan Cultural Centre-ah Prime Minister Narendra Modi kaihhruaiin NITI Aayog Governing Council vawi 11-na chu ‘Human Capital for Viksit Bharat’ tih thupui hmangin neih a ni a, he hunah hian Mizoram atangin Chief Minister Lalduhoma pawh telin thu a sawina ah Mizoram chu India rama Fully Literate State hmasa ber a niht hu sawiin, “Tunhnaiah Human Development Index-ah kan thang chak hle a, hmarchhak Bial District Sustainable Development Index report-ah kan District zawng zawngte chu hmahruaitu (front runner) an ni mek vek a ni,” a ti a. Viksit Bharat 2047 milin Transformed Mizoram 2047 kalpui mek a nih thu sawiin, “Kum 2047-ah khian Mizoram chuan India ram GDP-ah 1% lo thawhchhuah ve theih kan tum a ni,” a ti.

Chief Minister chuan Full Literacy-ah hian kan duh tawk mai lo tih pawh sawiin, “Digital Literacy lamah te, Financial Literacy lamah te, Skills & Entrepreneur lamah te tan kan la zui zel a. Kan thalaite hi tunlai thiamna sang zel mila hnathawk thei turin kan buatsaih. EV Maintenance te, Drone Technology te, Artificial Intelligence leh Solar Technology thlengin training kan pe a. Sawrkar kum kalta chhung khan thalai 26,500 te chu Skill Training chi hrang hrang kan pe a, an zinga zaa 72 aia tam mahin hna an hmu zui a. India Skills Northeast Regional Competition 2025-26 ah Mizoram State chu Champion State a ni,” a ti a. Innovation & Entrepreneurship chu tih makmawh a ni tih an hriat avangin Chief Minister’s Innovation Challenge kalpui a nih thu pawh sawiin, “Sawrkar Department te, Civil Society Organisation te, College leh Grassroot lam thlengin an tel a. Start-ups leh Entrepreneur bultan chho mekte thawhpuina tur Mizoram Handholding Venture Capital Fund kan siam bawk,” a ti a. Digital lama hmasawnna chu an ngaihpawimawh ber zinga mi a nih thu sawiin, “Tunah hian hmarchhak Bial-a Telecom Network nei tha ber zinga mi kan ni a, kan Tele-Density pawh 112 a ni a, e-office kan kalpui tawh a, Land Record kan Digitised chho a, mipuite hnenah Digital Service langtlang takin kan pe chho tan mek,” a ti bawk.

Hmarchhak tana Prime Minister hmathlir ropui tak tihhlawhtlinna kawngah High Level Committee on North East Economic Corridor rawtna chu tihhlawhtlin theih a that thu pawh Chief Minister chuan sawiin, “Kha rawtna khan kawngpui, Rel kawng, Thlawhnaa inkalpawhna, Tui lama inkalpawhna, Power inthlunzawmna, Telecom inthlunzawmna leh bungraw phurh kualna lamah hmarchhak State-te hi mual khata thlirin (one grid approach) ruahmanna a duang a. Kan za atana hlawk tlanna, kan chhawrtlan tur rawtna a ni,” a ti bawk.

Heng bakah hian Chief Minister hian Act East Policy leh Indo-Myanmar-Thailand Trilateral Highway tihhlawhtlin thuai a tulna te, economic hmasawnna ngaihtuah ruala vantlang nun him leh ralmuang nei tura hmalak a tul thu te, investment chu hmarchhak Bial pum thlira State tinte chakna lai hre chunga a hlawm (cluster) a kalpui a that thu te, Mizoram chu Tourism lama theihna sang tak nei a nih thu te, Thenzawl Peace City tihhlawhtlin ngei a tul thu te a tarlang a. Mizoram sawrkar Handholding Programme chu Viksit Bharat 2047 tihhlawhtlinna programme a nih avangin sawrkar laipuiin Special Support pe thei se a duh thu bakah NITI Aayog State Support Mission chu Mizoram tana a tangkai thu sawiin, State Support Mission 2.0 lo chhuak thuai se tha a tih thu a sawi bawk.