Indian Red Cross Society Mizoram State Branch Annual General Meeting Larsap hovin neih a ni

Indian Red Cross Society (IRCS), Mizoram State Branch Annual General Meeting hmasa ber chu Inrinni, Nov. 29, 2025 khan neih niin angkai taka hman turin First Aid Tutorial Video paruk (6) chu tlangzarh nghal a ni.

IRCS, Mizoram State Branch Annual General Meeting hi Aizawl-a Raj Bhavan Durbar Hall-ah neih a ni a, he hun hi IRCS Mizoram State Branch President leh Larsap General (Dr) Vijay Kumar Singh chuan hmanpuiin tunhnai hun reilote chhunga IRCS Mizoram State Branch hmalakna chu fakawm a tih thu leh tun aia Member tam zawk leh hmalakna tam zawk neih a nih theih nan Red Cross Society awmzia, kalphung leh hlawkna te puanzar tam a tul thu a sawi a. Emergency huna che chhuak thei tura Mizo tawng ngeia inzirtirna, First Aid Tutorial Video 6 lai tlangzarh a ni chu lawmawm a tih thu sawiin, tangkai taka hmang turin mipuite a chah a. IRCS Member-te chu hmabak tam tak a la awm avangin infuihphur tawn thin tura chahin, “Hna kan thawh tam chauhin hriat kan hlawh dawn a, Red Cross Society zawmtu pawh kan neih belh zel dawn a ni,” a ti a. Meeting leh hunah hmasawnna nasa zawk hmuh theiha a awm ngei a beisei thu a sawi bawk.

He hunah hian IRCS Mizoram State Branch Managing Committee Chairman H. Lalengmawia chuan inlawmna thu sawiin, Report hrang hrang ngaihthlak a ni a, Larsap chuan IRSC Mizoram State Branch Chairman Superannuation Pension-a chhuak H. Lalengmawia hnenah thlahna thuziak hlanin First Aid Tutorial Video siamtu I&PR leh ZMC&H Director-te hnenah thuziak a hlan bakah Life Member thar pathum te kutah Life Membership Certificate a hlan bawk a ni.

IRCS Mizoram State Branch Annual General Meeting-ah hian tun dinhmunah IRCS Mizoram State Branch hnuaiah Life Member 18 leh Aizawl khawpui chhung College pathum - Govt. Aizawl College, Govt. Aizawl North College leh Govt. T. Romana College atangin Youth Red Cross Unit Member 100 chuang hret an awm mek thu tarlan a ni a, Member neih belh dan turte sawiho niin Aizawl District bakah District zawng zawngah Deputy Commissioner kaihhruai Red Cross Society din vek a nih theih nana hmalak nise, zau zawka tanlak a nih theih nan YMA leh NGO dangte nena thawhho dan ngaihtuah nise an ti a. Remchang hmasa berah Huhliap Short Stay-ah First Aid Training buatsaih nise tih niin, Half Marathon buatsaih tha an ti bawk a ni.