GST lakna thenkhat sawrkar in a tihniam

Sawrkar laipui chuan GST a lakna thenkhat a tihniam a, he GST rate thar hi tun thla ni 22 atanga hman tan tur a ni.

GST lak dan thar chungchang hi Union Finance Minister Nirmala Sitharaman chuan sawiin, mi naran leh Middle Class te nitin mamawh leina ah zaa 18 emaw, zaa 12 emaw zaa 5 emaw-a tihhniam an rel tih a sawi a, heng Hair Oil te, inbualna sahbawn, Shampoo, Toothbrush, Toothpaste, Bicylce, Tableware, Choka bungrua leh Inchhung mamawh hrang hrang ah te GST zaa 5 chauh lak a ni tawh dawn a. Bawnghnute, chana leh Paneer ah te, Namkeen, Bhujia, Sauce, Pasta, Noodles, Chocolate, Coffee, Preserved Meat, Cornflake, Butter leh Ghee ah te zaa 5 chauh lak a ni tawh dawn bawk a ni.

Heng bakah hian GST tih-hniam langsar zingah Car te chi ho leh lirthei ke hnih nei 350cc chin ah GST zaa 28 lak thin chu zaa 18 a tih-hniam a ni a. Bus, Truck leh Ambulance ah te zaa 28 atangin zaa 18-ah tihniam a ni bawk a. Auto Part zawng zawngah zaa 18 lak a ni anga. Three Wheeler-ah zaa 28 atangin zaa 18 ah tlakhniam a ni bawk.

Damlo enkawlna damdawi thenkhat natna khirkhan enkawlna damdawi chi 33-ah te zaa 12 lak thin chu lak a ni tawh dawn lo a. Cancer, natna khirkhan leh Chronic Disease enkawlna damdawi chi 3-ah zaa 5 lak thin chu tihtawp a ni bawk a. Heng bakah hian damdawi hrang hrangah zaa 12 lak thin chu zaa 5 ah tihhniam a ni bawk a ni.