CSS hnuaia thawktu ten a huho-a chawlh lain Department hrang hrangah harsatna a thleng
Mizoram-a Centrally Sponsored Scheme (CSS) hnuaia hnathawk inzawmkhawm, AMCECC te hian lungawi lohna lantir nan nimin khan a huho in chawlh an la a, an thuchhuaha an tarlan danin, sawrkarin CSS hnathawkte dahnghehna tur, Regularization Scheme a siam sak tawh hman a nih theih nana ngaihtuahna a seng lo leh DPAR Minister thurawn anga kumin May ni 19-a lehkha an thehluh tihbo sak an ni chu mak an tih thu leh dahnghehna tur Scheme chu ngaihtuah vat an phut thu te, tunhnaia Mizoram sawrkar hnuaia thawk, CSS hnuaia thawk pawh nilo te Regularization of CSS Employees Scheme 2024 hmanga dah ngheh an ni chu mak an tih thu leh sut leh an phut thu te, Chief Minister in Independence Day lawmnaa a thusawi ah CSS hnuaia thawkte chu dan lo anga lak tia a sawi chu na an tih thu leh dan ang thlapa lak an nih thu an sawi a, dan lo anga lak an awm a nih chuan a latute chunga action la zawk turin an phut tih an sawi bawk a ni.
Hetianga CSS hnuaia thawktu ten lungawi lohna an lantir avang hian hmun hrang hrangah sawrkar hnathawh a khaihlak a, a bik takin zirna In tam takah harsatna thlengin damdawi In-ah pawh CSS hnuaia thawktute hnathawh hrang hrang a khaihlak bawk a. AMCECC chuan Mizorama Sawrkar Damdawi In hrang hranga CSS hnuaia thawkte an chawlh avangin damlo enkawl kawngah harsatna nasa tak a thlen thu leh PHC/UPHC leh Sub-Centre engemawzat khar a nih thu sawiin, zirna lama thawktu tam zawk an chawlh avangin School 500 chuangah zirna kalpui theih a nih loh thu an sawi a. Development Works khawihtu Department hrang hrang - RD&AD, UD&PA, Agriculture, Horticulture etc hnuaia CSS staff te an nawrh tel avangin ni 100 inhlawhna, Self-Help Group kaihhnawih, Digital Crop Survey, Insak tanpuina etc te kalpui theih a ni lo tih sawiin, Social Welfare hnuaiah Women & Child Development a hna kal mek a chawl vek bawk niin an sawi.
Serchhip District-ah pawh CSS hnuaia thawktu hrang hrang ten he nawrhna hi thlawpin nimin khan AMCECC Sub-Hqrs. Serchhip District hruaitu chu chhuakkhawmin sawrkar Department hrang hrang Office an fangkual a, Office hrang hrang 15 an tlawhkual thu sawiin, Mass Casual Leave an lak chu CSS hnuaia thawktu ten an zawm that thu an sawi a, Serchhip District Hospital-ah Eye Department leh Gynae Department te chauhin OPD an hawng thei tih an sawi bawk.