Zote South Sawhthing sawifiah

Serchhip District chhunga Zote South khuaa Sawhthing hralh theih loh nia sawi chungchang chu nimin khan Serchhip Bawrhsap in thuthar thehdarhtute hnenah a sawifiah.
    Bawrhsap chuan March 31, 2025 khan Zote South-a Sawhthing hralh theih loh chungchang ah Video hmangin thu belhchian dawl lo thehdarh a ni tih sawiin, sawrkar chuan khaw hrang hrang tan Sawhthing hralh tur zat hi bitukin hemi bak lo cho rih lo tura hriattir an ni tih a sawi a. Zote South khua hian Sawh-thing an hralh tur zat bituk aia tam an hralh thu leh hetihlai hian Zote South khuaa mi pakhat chuan a mimal thahnem ngaihna in Sawhthing hralhna lo zawngin kg. khat Rs. 22/- vela hralhna a hmuh theih avangin Sawhthing chingtute chu lo cho lawk tura a hrilh thu a sawi a. Mahse a leitu tur (hnam-dang) hian a leisak leh tak mai si loh avangin an ruahman leh beisei angin thil a kal ta lo a, harsatna an tawk ta niin a sawi a, Video-a lang Sawhthing te chu sumdawng in an lei tura buatsaih mek a nih thu pawh a sawi bawk a ni.