November 21 hmaa SHC-a sawrkar siam turin MNF leh HPC (R) ten hma an la mek zel

Sinlung Hills Council (SHC) Inthlanpui vawi hnihna neih zawh a nih hnuah sawrkar thar siam tura hmalak mek a ni a, tun thla ni 21 hmain sawrkar thar hi lakluh tura ruahman a ni.

Tun thla ni 5-a Sinlung Hills Council Inthlanpui neih zawh taka thawkdun MNF leh HPC (R) te hian Seat 12 awm ah Seat 7 lain heng party pahnih atanga thlantlin te hian Joint Legislaturte Party dinin Zirtawpni, Nov. 8, 2024 khan Aizawl DC leh District Election Officer (DEO) Lalhriatpuia hnenah sawrkar an siam theih thu hi ziakin an thlen a, he lehkha hi MNF General Secretary TC. Kaphmingthanga chuan Aizawl DEO hnenah hian thehlutin an lehkha ah hian MNF leh HPC (R) Joint Legislature Party chuan Bial 12 awmna Sinlung Hills Council Inthlanpui neih zawh takah Bial 7-ah hnehna an chan thu leh sawrkar thar an siam theih thu an ziak a ni.

Thudawn danin MNF leh HPC (R) ten Sawrkar an siam theih thu Aizawl District Election Officer (DEO) hnena an thlen hi DEO chuan Sinlung Hills Secretariat-ah thlenin anni hian Minority Affairs leh Mizoram State Election Commission-ah an thlen ve leh dawn a, tun thla ni 21 hmain Sinlung Hills Council-a sawrkar thar hi lakluh tura ruahman a ni.

Hetihlai hian Sinlung Hills Council Inthlanpui neih zawh taka thawkdun MNF leh HPC (R) te hian sawrkarna siam thei khawpin hnehna chang mah se sawrkar thar an siam ngei dawn em tih erawh a chiang leh lo niin nimin lamah thuthang a awm a. He inthlanna neih zawh takah khan MNF leh HPC (R) te chuan Seat 12-ah Seat 7 lain sawrkar an siam thei a, Party mal-ah MNF chuan Seat 5 lain HPC (R) hian Seat 2 an la a, ZPM leh HPC tangdun chuan Seat 4 lain an vai hian ZPM party Candidate te an ni a, Congress Party chuan Party mal-a inthlan chuhin Seat pakhat an la a, HPC (R), ZPM leh Congress Party te hian sawrkar thar hi siam an tum niin thuthang a awm a, hetianga MNF leh HPC (R) inkara harsatna awm hi CEM tur chungchanga inremna an neih theih loh vang nia sawi a ni bawk. Amaherawh chu nimin tlai lam khan MNF leh HPC (R) te chu thukhawmin hma an la zel a, Vawiin chawhnu lamah chuan sawrkar thar lakluh hun tur hi hriat theih beisei a nih thu Vanbawng Bial atanga thlantlin Ricky Lalremsanga chuan a sawi a ni.