Inren vangin sum tam tak an hum thei niin sawi

Adviser to Chief Minister (Finance) TBC. Lalvenchhunga chuan kawng hrang hranga sawrkar sum inren avangin pawisa tam tak an hum thei nia sawiin, mipui hmasawnna tura hman ngei a ngaih thin avangin kawng thenkhatah erawh pawisa hman tam ngai a awm niin a sawi.

He thu hi Akashvani Aizawl Correspondent nen an inkawmna ah sawiin Adviser to CM chuan Department thenkhat ah hna a khaihlak theih dawn avang leh mipui hmasawnna tur a khaihlak theih avangin sum renchem vek a theih loh thu a sawi a, sum hman ngei ngaihna tam tak a awm a, inrenchemna an kalpui chu awmze neia kalpui a ni a, MLA te leh Officer lian ten MR an chhawr theih chin tihtlem anih avangin thla tin cheng nuai 12 atanga cheng nuai 14 an hum thei tih sawiin, insawhngheh kum an hman chuan awmze thui tak a nei dawn tih a sawi a ni.

TBC. Lalvenchhunga chuan leiba chhawm tam tak bakah pension hlawh pekchhuah tur tam tak a awm thu sawiin, GP pung te nen a vaiin cheng nuai 400 chuang an pechhuak tawh tih a sawi a. Hetihlai hian sawrkar hnathawk hlawh chu a hun takah an pe thei char char niin a sawi bawk.