Mizoram Chief Minister in AMFU hruaitute leh mi pawimawh hrang hrangte a kawm

Chief Minister Lalduhoma chuan nimin khan All Mizoram Farmers' Union, (AMFU) General Headquarters hruaitute kawmin an hmalakna hrang hrang a sawipui.

Chief Minister Pisa-a AMFU hruaitute a kawmna ah hian Chief Minister chuan kuthnathawktute chu an ngaihpawimawh te an ni tih sawiin, Chutihlaiin hlawhtlin tum lova tanpuina sum chauh duh te erawh chu an ngaithei vak lo thung ang tih a sawi a. Tunah tak hi chuan an policy te kalpui turin budget thar pawh an la nei lo tih sawiin, “Kan hriatthiam vek ka ring a, kan nghah hram hram a tul a ni,” tiin sawrkar dinhmun a lo hrilh a ni.

Tunah hian AMFU hian Tree borne Oil Scheme hnuaiah Agriculture Department nena tangkawpin Tung chingtu chhungkaw 524 an enkawl mek a, kuminah chhungkaw 700 vel tihbelh leh an rilruk a niin an sawi a. Tung kara chin tur thlai pawh an dap mek bawk. Tung rah hi tunah hian kg 1 ah Rs. 54 in hralhna a awm reng niin an sawi bawk.

Nimin khan Chief Minister hian Border Security Force Sector Hqrs., Aizawl-a Deputy Inspector General Kalyan Kanti Mazumdar chu kawmin an hnathawh tlangpui a zawt a. Sawrkar in Silsuri-a Border Trade Centre kalpui a tum dan te hrilhin, BSF lamin an hnathawhna lama harsatna an neih Mizoram sawrkar tih theih te an thlen bawk a ni. Nimin vek khan Chief Minister hian a Pisa-ah Lt. General HS Sahi, 3 Corps Commander, Assam Rifles, Dimapur chu kawmin Chief Minister chuan Assam Rifles ten Mizote thian nih tlin takin hma an la thin tih a lo hrilh a. Tunhma atang tawha Mizote leh Assam Rifle te inthianthatna chu vawng nung zel a duh thu a sawi bawk a. Lt. General HS Sahi hian Chief Minister hi lawmpuina hlanin Mizoram sawrkarin Assam Rifle te mamawhna a neih apiangah an inhawng hle tih a hrilh bawk a ni.

Chief Minister hian niminpiah khan State Bank of India General Manager, Dhruba Charan Bal pawh a Pisa-ah kawmin Mizoram chhunga State Bank of India hmalakna te an sawi dun a. Chief Minister chuan Mizoram-a Bank thenkhatte Credit Depodit ratio a hniam hle chu a ngaimawh thu sawiin, Mipuite tana hmasawnna hna an lo thawh ve na kawng pawimawh an ngaihthah deuh nia a ngaih thu a hrilh a. Mizoram sawrkarin Hand Holding Policy kalpui turah pawh bank ten mawhphurhna pawimawh tak an neih tur thu a hrilh a ni. SBI General Manager hian Mizoram-ah Market Share tam zawk nei tura loan tam zawk an pekchhuah theih nan hma an la mek tih sawiin, Lunglei te pawh tlawhin loneitute, a bikin Dragon Fruit chingtute pawh a kawm thu leh Mizoram-ah loan nasa zawka pek an tum thu a sawi a ni.