Zomi Council Steering Committee in lawmthu hrilh

Zomi Council Steering Committee hruaitute chuan Chief Minister Zoramthanga chu tunhnai mai ni lo, hun rei tak ata tawh Manipur Zofate tana a lo thawh tawh thinna zawng zawngah lawmthu an hrilh.

Zomi Council Steering Committee hruaitute hian Inrinni khan an Leader T. Kaithang hovin Chief Minister hi a Pisa-ah hmuin an ngenna angin Chief Minister hian an kal zel dan turah thurawn hrang hrang a pe a. Mizoram in inthlanpui kan hmachhawn dawn avangin engkimah lo tanpui nghal zat zat a harsa palh thei a, amaherawh chu mipuite mamawh an tihsak theih awm apiangte chu theihtawpin sawrkar in a ngaihtuah dawn tih a hrilh a, a tul anga be pawp zel thin turin a chah bawk.

Zomi Council Steering Committee-te hian, buai tirh phat atangin an mamawh engkim Mizoram atangin an chawlut vek tih sawiin, mipui mamawhte tluang taka an lak theih nan Mizoram sawrkarin Tuivai lei a siamthat sak a, Daido lam kawng chei sakin, Hliappui to Kawlkulh kawng siamthatna a ruahman bawk tih an sawi a. “Mizoram mipuiten min hmangaih em em a, Media hmun tinrengah min tanpui a; Mizoram MP pahnih Pu C. Lalrosanga leh Pu K. Vanlalvena ten kan tan Parliament-ah theihtawp an chhuah reng bawk a. Kan lawmin kan thla a muang a, lawmthu kan rawn sawi a ni,” an ti bawk.