MZU-a Mizo Department Silver Jubilee lawm

Mizoram University-a Mizo Department chuan Inrinni khan MZU Auditorium-ah an kum 25 tlinna, Silver Jubilee an lawm.

MZU-a Mizo Department Silver Jubilee lawmna hunah hian Chief Minister hlui Lal Thanhawla chu khuallian niin Mizo Department chu Mizo tawng tihausa zual zel tur leh tichangtlung zel turin a fuih a, thangthar te'n Mizo tawng pawimawhzia an hriat a tul thu sawiin, Mizote tan chuan dik taka ziah leh chhiar chu tih makmawh a nih thu a sawi bawk. He hunah hian Lal Thanhawla hian Silver Jubilee Souvenir a tlangzarh nghal bawk a ni.

MZU Vice Chancellor Prof. Dibakar Chandra Deka chu he hunah hian khualzahawm niin Mizo tawng leh hnamzia te chu thulehlin (translation works) hmangte a phochhuah a tulzia a sawi bawk a ni.

Mizoram University-a Mizo Department Silver Jubilee lawmna inkhawm hi Mizo Department Head Dr. Ruth Lalremruati chuan kaihruaiin Prof. Laltluangliana Khiangte chuan kalkhawmte lawmna thu a sawi bakah Silver Jubilee lungphung a hawng a. He hunah hian Mizo Department-a thawktu leh zirlai boral tawhte sunna hun an hmang bawk a ni. MZU hnuaia Mizo Department-ah hian kum 2007 khan Ph.D tih theih niin kum 2010-ah M.Phil tih theih a ni a, tun thlengin mi 8 in Ph.D leh mi 23 in M.Phil Degree an hmu tawh a ni.