Hnahlan-ah Grape lei chawlhsan; Champhai in la lei

Kumin ah Hnahlan Grape Growers & Processing Coop. Society Ltd. chuan grape quintal 989.53 leh Champhai Grape Growers & Processing Society in quintal 1006 an lei tawh a. Hnahlan winery hian grape tui dahkhawlna an neih tawh loh avangin kumin bik atan Grape lei hi an chawlhsan.

Hnahlan Grape Growers & Processing Coop. Society Ltd. hian nikum 2022-a grape tui (Isabella) an tharchhuah hralh loh a la tam avangin tanky-in a tlin tawh lo niin an sawi a. Tun dinhmunah grape rah la lo zo lo pawh an la awm nual a. Winery-a dahna tur a awm tawh si loh avangin grape chingtute lo hrethiam hram hram turin an ngen a ni. Kumin hian Hnahlan-ah chuan C.Vanlalhriata chuan Grape thar tam berin quintal 106.97 an thar a ni.

Champhai Winery chuan Zirtawpni zan thleng khan Grape hi quintal 1006 an lei tawh tih sawiin, lei chhunzawm zel an tum niin Society hruaitute chuan an sawi a. A hma chuan grape hi kar khatah ni 2 an lei thin a, kar kalta atang chuan Nilaini-ah chauh lei an tum tawh a ni.

Horticulture department chhinchhiah danin nikum khan Hnahlan chhehvelah grape quintals 1500 vel thar a niin heta tang hian Rs. 90,00,000 vel an lalut a. Champhai chhehvel ah quintals 1244.98 tharin hemi atang hian Rs. 68,69,899.80 an lalut niin an chhut a ni.