SDGs hlawhtlinna tur inelna neih tur hawng

Aizawl Mayor Lalrinenga Sailo chuan nimin khan Sustainable Development Goals (SDGs) tihhlawhtlin kawnga Aizawl Municipal Corporation huamchhunga Local Council thlanchhuah 19 te inelna tur ‘Urban Indicator Framework for Localization of SDGs’ a hawng.

Directorate of Economics & Statistics Conference Hall-a he inelna tur hawnna ah hian Aizawl Mayor chuan SDGs 17 zinga a hnuhnung ber, ‘Hlawhtlinna chang tura thawhhona tha neih’ chu bul an tanna tur a ni tih sawiin, Planning Department-in ngaihtuahna tha tak senga India rama a hmasa ber ni tura Localization of SDGs an ruahman chu lawmawm a tih thu a sawi bawk.

United Nations hnuaia ram hrang hrang 193 ten kum 2015 a lungrual taka hmasawnna kawng hrang hranga thawhhona tur atana thuthlung an ziah Sustainable Development Goals (SDGs) hi hmasawnna ngelnghet, mitin hnena thleng tura duan niin tihhlawhtlin tum (goals) 17 a nei a, hengte hi kum 2030 ah chuan tihhlawhtlin vek tumin nasa taka tan lak mek a ni.