District Level NCORD Committee thutkhawm neiin District chhunga ruihhlo dinhmun an thlirho

Sawrkar laipui ruahmanna anga din District Level Narco Coordination Centre (NCORD) Committee chu nimin khan Serchhip-ah thukhawmin an hmalakna tur hrang hrang an sawiho.

Serchhip DC Meeting Hall-a NCORD Committee thutkhawm hi an Chairperson leh District Magistrate Nazuk Kumar IAS chuan a kaihruai a, he Committee hi kumin April thla a din kha niin District Magistrate chu Chairperson niin Superintendent of Police chu Member Convener a ni a, Member atan hian Chief Medical Officer, District Education Officer, District Social Welfare Officer, Divisional Forest Officer, District Agriculture Officer, Assam Rifles leh BSF-a Commander/Post Commander, Law & Judicial Department atangin SDM, District Drug Inspector leh NCB aiawh te ruat an ni a, nimin-a thukhawm hian heng bakah hian Excise & Narcotics Department-a Asst. Commissioner leh Serchhip Sub-Hqrs. YMA aiawh te chu member atan ruat belh nise an ti bawk.

District Level Narco Coordination Centre (NCORD) Committee hi ruihhlo dona kawnga kawng hrang hranga hmalaa thawkho tura beisei niin an hnathawh tur pawh fel taka ruahman sak an ni a, heng an hnathawh tur hrang hrang bawhzui dan turte chu he hunah hian sawihona neih a ni bawk a, hmalakna tur zingah zirna In leh College-a ruihhlo thatloh zia inzirtirna neih te, dan lova ruihhlo tawlh thin tihreh a nih theihna tura hmalak te, dan lova ruihna atana hman chi Poppy/Cannabis leh thildang chin thin te tirem tura hmalak leh District chhunga ruihhlo ngai te enkawlna hmun enfiah thin te pawh a tel a ni.

Nimin a NCORD Committee thutkhawm ah hian Police Department hotute chuan Serchhip District-a ruihhlo ngawlvei awm an chhinchhiah dan tlangpui tarlangin, Serchhip khawpui bikah mi 250 vel awmin Chhiahtlang-ah 21 vel awm anga chhinchhiah an ni a, Thenzawl-ah 80 vel awmin North Vanlaiphai-ah mi 20 vel an awm a, heng bakah hian khaw dangah pawh ruihhlo ngawlvei hi mi thahnem tak an awm thu tarlan a ni a. Serchhip District Police te hian April thla khan Keitum bul Tuichang kam-ah Heroine No. 4 kg. 1.278 manin hei hi tum khata an man tam ber a nih thu leh tualchhunga hralhna rate ah cheng nuai 31 hu vel a ni tih an sawi. Excise and Narcotics Department hotute pawhin kumin January thla tir atanga May thla tawp thlengin Heroine No. 4 hi gram 456.82 man tawhin Ganja kg. 8 leh Codeine bur 9 an man tawh thu an sawi a, heng kaihhnawih ah hian thubuai 22 ziaklutin mi 26 man an nih thu an sawi bawk. Health Department hotute hnen atangin Serchhip-ah OST la mi 120 an awm thu he hunah hian tarlan a ni bawk.