Chanchin thar thenkhat :

 High Court Judge in tlawh

Gauhati High Court Judge leh Mizoram State Legal Services Authority (SLSA)-a Executive Chairman, Justice Michael Zothankhuma chuan nimin khan Mamit District Jail tlawhin Jail tang mekte dinhmun leh harsatna an neihte ngaih-thlaksakin Jail Building leh hmunhmate a enfiah bawk. Hemi hnu hian Mamit District chhunga Para Legal Volunteers (PLV)-te tan intuaitharna hun buatsaih chu I&PR Conference Hall-ah hman-puiin PLV te hnathawh tur leh an tihtur ber chu Dan hnuaia midangte tanpui a ni tih sawiin, miharsa leh thil hrelo zawk te'n Court sang zawk thleng kher lova an awmhmun-a an harsatna chinfelpui leh thingtlang lama awm ten Sawrkar Department hrang hrangte hmalakna leh tanpuina awm thei tur hrilhhriat kawnga midangte tanpuite pawh an tih tur a nih thu a sawi bawk.


FPO kalpui dan tur sawiho

Nimin khan Lunglei-ah District Bawrhsap, V. Lalsangliana kaihhruaina in District Level Monitoring Committee for Central Sector Scheme (CSS) ‘Formation and Promotion of 10,000 Farmer Producer Organizations (FPOs)’ chu a vawi khatna atan an thukhawm a. He hunah hian hmalakna kalpui dan tur sawifiahna neiin he hmalakna in tum ber chu kuthnathawktute dinhmun chawikan niin Farmer Producer Organizations (FPOs) kaltanga hmalak tum a ni a. He hmalakna hnuaiah hian India ram pumah kum 5 chhungin Farmer Producer Organizations (FPOs) 10,000 din tum niin SFAC, NCDC leh NABARD-te chu Implementing Agency an ni a. FPO-te hian kum thum chhungin tanpuina cheng nuai 18 thleng an dawng thei a ni.


SP Office kum 1-na lawm

Hnahthial District a Superintendent of Police (SP) Office in kum khat a tlin lawmna chu nimin khan Hnahthial DC, Vanlalmawia hovin neih a ni a, Hnahthial SP hnuaiah hian thawktu mi 117 awm tur an nih lain tun dinhmunah mi 49 an awm mek a ni.


Zirtirtu tha thlangchhuak

Kumin-a Mizoram puma Zirtirtu tha chawi-mawina, 'State Award to Techer, 2020' dawng turin Vanlalhliri Sailo, Headmaster, Govt. Hnahthial H/S; Malsawma Sailo, Headmaster, Govt. M/S-II Rahsi Veng, Lunglei leh R. Lalpianthanga, Teacher, Govt. Chawnpui P/S Aizawl te chu thlan an ni.


ZPM Tawngtai rualna nei

ZPM General Hqrs. bultumin nimin khan Mizoram hmun hrang hrangah tawngtai rualna neih niin he hunah hian LC/VC election lo awm tur tluang taka neih a nih theih nan leh Candidate te, Covid-19 hripui vei te leh mipui ten an kai belh zel loh nan te, Lirighing avanga harsatna tawk zawng zawng te tan tawngtai a ni.

Comments

Chhiar Hlawhte