National Handloom Day vawi 12-na lawmna ZOHANDCO buatsaihin Thenzawl-ah neih a ni
National Handloom Day lawmna hunah hian I&PR Minister B. Lalchhanzova chuan kum 1980 chho atang tawhin Thenzawl mipui engemaw zatte’n eizawnna atan Puantah chu an lo hman tawh thu sawiin, Puantah hlutna tlahniam zel chu kum 2009-ah NABARD puihnain, Cod Nerc leh Puantah Association tangrualin tharthawh leh a nih thu a sawi a. Puantah-a eizawnna chu ngaihlua, a thanlen zel theih nana hma la zel turin khawtlang hruaitute pawh a chah a. Mipate pawhin hmeichhe hna chauha ngai lova puan tah ve turin a sawm bawk. Minister chuan Puantahtute chu Mizoram mai ni lo, ram dangah pawh tam zawka hralhchhuah a nih theih nan design lama tan la thar leh tur leh quality tha lehzual, kuthnu faktlaka siamchhuah tum turin a a fuih bawk a; Mahni duhzawng ngawt ni lovin, a leitute duhzawng te leh hnamdangte lawm zawng tura tih dan thar ‘Innovative’ zawkte ngaihtuah turin a fuih a. Designing lama training-te pawh uar lehzuala neih a nih theih nan ZOHANDCO te nen tang tlanga hma la thar zel turin a fuih bawk a ni.
He hunah hian ZOHANDCO Managing Director, L.P. Lalchangkima pawhin kum 2019 Census-ah Mizoram-ah puantahtu 30,000 vel awm chu tunah chuan 40,000 chuang an tling tawh tih a sawi a. ZOHANDCO hmalakna hrang hrangte sawiin, New Delhi Safdarjung-ah Mizo thil siam bik zawrhna dawr thar (750 sq. feet) chu Chief Minister-in nimin khan a hawn dawn thu leh Kolkata leh Bangalore-ah te pawh hmalak mek niin Bangalore-ah phei chuan December thla khian Pisa building peih a nih tawh tur thu a sawi a. Thenzawl ZOHANDCO Pisa sak mekah T-Shirt puan tahna khawl dah tum a nih thu te, Mizoram hmun hrang hranga Common Facility Centre din tura proposal siam mek a nih thute sawiin, MISTIC, Science & Technology te nen tangkawpin hnam ro thil hlute a neitu nih chhinchhiahna G.I. Tag leh Patent te an buaipui mek thu a sawi bawk.
National Handloom Day hi August ni 7, 1905-a mahni ram thil siam ngaihlu tura hmalakna ‘Swadeshi Movement’ tan ni hriatrengna ni atan Ministry of Textiles chuan kum 2015 khan a puang a. Thenzawl-a National Handloom Day lawmna pual hian Handloom Exhibition buatsaih niin chawhnu lamah Traditional Handloom, Trademark, Patent leh Geographical Indication (G.I) chungchanga inzirtirna chu ZOHANDCO Asst. Manager Rodingluaia hovin neih a ni bawk.