Cancer Research Centre mamawhna a san thu sawi
August 23, 2026 khan Varanasi (Uttar Pradesh)-a Banaras Hindu University chuan Swatantra Bhawan Auditorium-ah ‘7th Global Cancer Summit’ neiin he hun hi Health Minister Lalrinpuii chuan a hmanpui a, he hunah hian Mizoram chu India rama Cancer sanna ber a nih avanga kan harsatna hrang hrangte a tarlang a. Zuk leh hmuam ti kan tam avanga Cancer chi hrang hrang a tam thu te leh Hmeichhia Chhul Cancer venna, HPV vaccine chungchanga kan hmalakna hrang hrang te a sawi a. Mizoram in Cancer Research Centre kan mamawhna a san thu leh Mizoram hmasawnna tura Cancer Research Centre changtlung zawk neih theih dan kawng awm se a duh thu a sawi bawk.
He Summit-ah hian thupui atan ‘Living with cancer in the 21st Century’ tih chu hman niin Cancer natna chungchanga mithiam sawm bik ten paper presention an nei a. Cancer Research lama hnuhma nei tha tak takte pawh an tel a ni.
Health Minister chuan he Summit a tel mi thiam tak tak te nen inkawmhona hun an hmang zui nghal a, Central Sawrkar hnuaia ICMR leh Department of Science & Technology te nen tang tlanga Mizorama Cancer hluar chhan zirbingna tur - Cancer Research Centre neih theih dan tur kawng dappui tura an inhawn thu Minister hi an hrilh a ni.