Nimin-ah ASF vanga Vawk thi 10 a awm belh leh

Serchhip District-ah African Swine Fever (ASF) vangin Vawk thi a awm belh zel a, nimin khan Vawk thi chhinchhiah 10 lai a awm belh.
Serchhip-a AH&Vety Department hotute hnen atanga LENKAWL in thu a dawn danin nimin khan Serchhip District-ah ASF avanga Vawk thi 10 lai chhinchhiah belh leh awmin heng zinga 6 chu Chhingchhip khuaa mi a ni a, Ngentiang khua ah Vawk thi pathum chhinchhiah belh awmin Chhiah-tlang-ah Vawk thi pakhat chhinchhiah a ni bawk a, nimin vek khan hri darh zel tur venna atana Vawk suat 10 bawk awmin heng te hi Chhing-chhip leh Ngentiang khuaah pali ve ve a ni a. Heti hian nimin thleng khan Serchhip District-ah ASF vanga Vawk thi 827 awm tawhin Vawk 549 suat a ni tawh a, khaw 17-a chhungkaw 325 in he hri hi an tuar tawh a ni.

Chhinchhiahna atanga alan danin kumin hian Serchhip District-a ASF vanga Vawk thi leh suat tamna ber khua chu Serchhip Vengchung niin ASF vanga Vawk thi leh suat 212 a awm tawh a, Serchhip Kawnpui North-ah 160 awm bawkin Serchhip P&E Veng-ah 153; Serchhip Chanmari Veng-ah 112; Serchhip Darnam-ah 108; New Serchhip South-ah 107 leh Serchhip Dinthar-ah 105 te chu a tam zual an ni.