Tobacco Free lifestyle intihhmuh lawmawm an ti

National Tobacco Control Programme (NTCP) chuan zuk leh hmuam tel lo nun (Tobacco Free lifestyle) kan intihhmuh chho zel ni a lang mek chu lawmawm an tih thu an sawi.

National Health Mission (NHM) hnuaia National Tobacco Control Programme (NTCP)-a thawktute chuan nimin khan Aizawl-a DHME Auditorium-ah an hmalakna thlirhona leh intuaitharna hun (Yearly Review Meeting & Refresher Training) an hmang a, he hun hi NHM Mizoram-a Mission Director Dr. Lily Chhakchhuak chuan kaihruaiin Mizoram chhunga zuk leh hmuam dona kawnga hmalakna hrang hrang te zau takin thlirhona a ni a. Kohhran, tlawmngai pawl leh mipuiten zuk leh hmuam that lohzia kan hriat belh zel bakah zuk leh hmuam tel lo nun, Tobacco Free lifestyle kan intihhmuh chho zel nia lang mek te, zuk leh hmuam tih loh chu changkanna leh hriselna a ni tih hria an pung zel nia lang te chu a lawmawm takzet tih an sawi a ni.

Hetihrual chuan hmasawn ngai tak tak te pawh kan la awm ve bawk avangin tha thlah lova tan tlan zel a pawimawh zia he hunah hian tarlan a ni bawk a, a bik takin mahni Inchhung atanga thalai naupang zawkte kan enkawl a, kan kaihhruai dan hian thui takin zuk leh hmuam leh ruihhlo tha lo laka venhimna kawngah awmzia a nei theih avangin naupang thalai zawkte enkawl dan uluk lehzual turin kan pawimawh zia sawilan a ni bawk.

He huna tarlan a nih danin kum 2024 April atanga March 2025 chhung khan NTCP hian Awareness Campaign Education Institution-ah vawi 291, NGO leh Kohhran hrang hrangah vawi 62 neiin Training tum 40 an buatsaih a. Puipunna hmun hrang hranga Meizu leh zu lo enfiahna vawi 418 an nei bawk a. Vaihhlo leh a kaihhnawih ti thin mi 6645 te ti tawh lo tura intiam an awm bawk.