Halpuah leh halmawi khapna Bill thlirho a ni

Mizoram-a Halpuah leh halmawi khapna tura Dan duan chu a thuphung-a pawm a ni.

Nimin khan Home Minister K. Sapdanga hovin Aizawl-a Secretariat Conference Hall-ah ‘The Mizoram Regulation of Fireworks Bill,2025’ bihchianna neih a ni a, Halpuah leh halmawi khapna atan hian Drafting Committee chu Home Secretary Vanlalmawia Renthlei kaihhruaina hnuaiah din niin nimin-a thutkhawm ah hian Draft Bill chu uluk taka bihchianga zirchiang turin an pharh ta a ni. He huna kalkhawm ten uluk taka an bihchian hnuah leh zau taka sawiho a ni hnuah a thuphungin Committee chuan Bill hi tha a ti a. Law & Judicial Department te lo chulmam turin an rel bawk a ni.

He thutkhawm ah hian Chief Secretary Khilli Ram Meena leh DGP Sharad Agarwal te bakah Home, Law & Judicial, EF&CC, GAD, H&FW , MPCB, Fire& Emergency, I&PR Department-a High Official te, Aizawl DC, AMC Commissioner Aizawl SP, SP Traffic te leh Central YMA, Aizawl City Local Council Association, Mizoram Merchant Association(MIMA) hruaitute an tel a ni.