Lengpui Airport-ah PAP neilo American thawnkir

American nupa chu Protected Area Permit (PAP) nei lova Mizoram-a an lo luh avangin Lengpui tumhmunah hren niin Inrinni khan an ramah thawnkir an ni.

Intelligence lam atanga thudawn danin United States khua leh tui PAP nei lo Mizoram a luh tum an awm tih thu hriat  lawk a nih avangin Lengpui tumhmunah Zirtawpni khan an lo endik a. Hetah hian American nupa chu PAP nei lovin an lo thleng a. Hren zui nghal niin thil tul tihfel a nih hnuah Inrinni khan an ramah thawnkir an ni.

Thudawn thenkhatah chuan American nupa te hi Bangladesh lam ngaihven a rawn kal a, Lawngtlai District a luh tum anga sawi a ni a. Intelligence Officer thenkhat erawh chuan chutiang an hriat loh thu leh PAP an neih loh avanga hren leh thawnkir an nih thu an sawi a ni.

Kum 14 chhung,central sawrkarin a lo thlahdul tawh leh PAP leh RAP nei kher lova Mizoram tlawh theihna chu nikum December thla atang khan Ministry of Home Affairs chuan khauh taka kenkawh leh turin thupek a siam a. PAP leh RAP hi awlsam zawkin online a dil leh neih theih tura ruahman a ni a. Khuahkhirhna hi Myanmar ramri depa awm Manipur, Mizoram leh Nagaland tan bika tihnun thar leh a ni a. Central sawrkar phalna nei lo chuan heng State 3-ah te hian ram thenkhat mite chu luh khap niin heng hi Mizoram kaltlanga Myanmar-a ramdang mi lut an awm thin vanga hmalakna nia hriat a ni.