Mipui ten ‘ZPM aiin an tha zawk a ni’ an tih turin tan kan lak a ngai - Vice President, MPCC

Mizoram Pradesh Congress Committee (MPCC) Vice President Lalnunmawia Chuaungo chuan mipui ten an rintawk turin hmachhawp an neih a ngai tih sawiin, “Mipui ten Congress hi kan ram leh mipui tana thawk turin ZPM aiin an tha zawk a ni an tih turin tan kan lak a ngai,” a ti.

Nimin-a Congress Party in Aizawl Congress Bhavan-a Political Session an neih ah MPCC Vice President Lalnunmawia Chuaungo chuan hun a inthlak danglam a, mipuite mamawh leh duhthusam te pawh a inher danglam ve tih sawiin, “Mipuite beisei leh duh dan, an lungkham ram an thlenna tura an duh te kan hriatthiam a, kan zuk address chat chat theih a pawimawh a ni,” a ti a. Tunhma chuan Congress leh MNF kha duhtlan tur a nih mai thu leh chu chu kalphung a nih thu sawiin, “Party mal supporter te Vote ringawt in sawrkar-na siam turin a tlin theih loh, neutral te awn lam lam a ni mai,” ta ti a, “Mipui ten min rin tawk turin hmachhawp kan neih a ngai a ni. Mipui ten Congress hi kan ram leh mipui tana thawk turin ZPM aiin an tha zawk a ni an tih turin tan kan lak a ngai a, kan rilru-ah kan vawn a ngai a ni,” a ti.

MPCC Vice President chuan Assembly chhungah mai ni lo, pawn lamah leh nitin-a an khawsakna kawngah sawrkar khalh ngiltu an ni dawn tih sawiin, “Congress party hi keimahni inchhek arbawmna tur ni lovin ram leh hnam, mipuite tana thawktu kan ni a. Ram rawngbawlna kawngah theihtawpin tan kan la chhunzawm zel dawn a ni,” a ti a. Ram leh mipuite tana pawi tur sawrkar in a khawih a nih chuan mipuite thlavang an hauh dawn thu leh ram leh mipui te pawi khawihna thilah chuan an enliam mai mai dawn lo tih a sawi a. “Congress hi ram leh mipui ten harsatna hrang hrang an tawh atanga khaichhuak thei tura kan ngaih a ni. Sawrkar mek te an Policy te theihtawpa tihhlawhtlin tir tura nawr tur kan ni,” a ti bawk.

Mizo te chu hnam danglam tak, theihna nei tha tak kan nih thu pawh MPCC Vice President chuan sawiin, “A chhia leh tha pawh intih hmuh zung zung chi kan ni a. A tha lam zawnga kan kal vek chuan hmasawn zawnga tlan zawt zawt thei kan niin ka hria. Mizote hi tifuh zawngin kal lawklawh ila chu theihna hi kan nei a ni,” a ti a. Mizote chu hnam changkang tak, State changkang tak nei thei nia a hriat thu a sawi bawk.