November thla chhungin Kuhvarah man tam tawh

State chhunga dan lova kuhvarah phurh khap a nih lai leh DC te pawhin an District chhunga dan phalloh kuhvarah phurhluh leh District kaltlanga phurh khapna order an tihchhuah mek laiin, tun November thla chanve chhunga Police leh NGO ten hmun hrang hranga Myanmar kuhva ro an man zat chu bag 562 (kg. 49,480 vel) a tling tawh.

Tun November thla chanve chhunga Police ten dan phalloh kuhva rah an manna te hi Vairengte Police Check Gate, Sialsuk, Samlukhai junction, Ngopa (Saitual District) leh KVI Godown, Saitual bul-ah te a ni a, hemi bakah hian Hachhek Bial Kuhva Chingtute (HBKC) chuan, dan lova tawlh ruk Myanmar kuhva ro truck trip 2 (bag 120 phur ve ve) Luimawi bulah an man bawk.

Police ten dan phalloh kuhvarah phur lirthei an man zat chu 10 a tling a, a khalhtu (driver) te pawh man an ni a, an kuhva man thenkhat te chu Superintendent, Anti-smuggling Unit, Custom House, Aizawl, Superintendent, Custom Preventive Force, Seling-ah te hlan an ni a, Dan angin Police ten lain, a tul angin an chhuizui thin bawk.

Hetihlai hian Assam Police chuan Mizoram atanga an State-a phurhluh tur Kuhva hringte chu an la dan chhunzawm zel a, hei hi Mizoram-a kuhva thar tamna, Hachhek tlangdungin nasa taka an tawrh laiin Bilkhawthlir erawhin a sen laia hnamdang hnenah an hralh tawh avangin an buai nep niin an sawi thung a. Assam-in Mizoram kuhva an dan chungchangah hian hmalak mek reng a ni tih Kolasib DC John LT Sanga chuan sawiin, “Assam lam hian duh dan neuh neuh an nei a, chung an duh dante chu Cachar DC-in min hrilh a. Thuneitu sang lam, Home Secretary-ah thlen mek a ni a, Mizoram Kuhva te hi harsatna awm lova a tlang thuai kan beisei a ni,” a ti.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man