Kolasib District MJA ten Four Lane laih tura NHIDCL Package then dan an enfiah

NHIDCL ten Four Lane an laih turah Mizoram chhung hmun thenkhat, Assam NHIDCL enkawlna hnuaia package an dah chu nimin khan MJA Kolasib District OB te chuan a hmunah an tlawh.

Thudawn danin tunhma deuh khan Mizoram PWD chuan Lailapur khawchhung thleng kawng siam leh enkawl chu an kutah a awm thin a, Lailapur mi thenkhat ten Assam sawrkar an nawr hnuah Lailapur Mandir bul thleng Mizoram PWD ten an enkawl leh tawh a, NHIDCL package then anga kaltlang pui anih chuan ramri ah harsatna ala thlen theia alan avangin tunhnaia MJA Kolasib District thukhawm chuan hei hi zirchian a tul thu leh Package then dan tidanglam tura Mizoram Governor hnenah thlen an lo rel tawh a, tunah ramri-ah buaina thar awm lo mah se nakin zelah harsatna chawk chhuak theitu tur nia an hriat thu an sawi tawh a, compensation pawh Assam NHIDCL atanga an lak chuan Mizoram leilung a nihna bo ta anga ngaihtheih a nihna chen a awm niin an sawi.

Nimin-a helai hmun tlawhtu MJA hruaituten ram neitu, Vairengte mi thenkhat an biaknaah Assam NHIDCL hnuaia an awm chu an duhloh thu an sawi a, an harsatna hi District hotute hnenah thlen tawh mahse compensation lak chungchangah harsatna a awm ve dawn loh thu an lo hrilh niin an sawi. Kawng laih tur Package then dan hi pawl leh political party thenkhat pawhin an duh loh thu leh Mizoram sah hekna a nih thu sawiin, sawrkar chu Package then ti danglam tur hian an lo nawr tawh thin a ni.

Tarlan tawh angin NHIDCL hnuaia Four Lane laih turah hian Package 1 leh 2 chu NHIDCL Assam enkawlna hnuaia awm niin a bak Package 3 atangin NHIDCL Mizoram ten an enkawl thung a, Package 2 leh 3 inthenna hi Vairengte Police Gate bul niin a thlang lamah hian Vairengte mi chhungkaw 30 chuang cheng mek an la awm a, hei bakah kawngpui thar in a paltlang turah hian huan lo ram nei leh chhungkaw 20 chuang an awm mek bawk. Thuneitute sawi danin heng mite compensation lak tur hi pawisa a awm hunah Assam CALA kut atangin Kolasib District CALA kutah hlan a ni anga, anni hian huan lo ram neitute hnenah an hlan chhawng ve leh dawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man